Biryńǵaı qurylys portaly pılottyq rejımde iske qosylady
ASTANA. KAZINFORM — 2026 jyldyń basynda Qazaqstanda josparlaý men jobalaýdan bastap paıdalanýǵa berýge deıingi qurylys obektilerin súıemeldeıtin biryńǵaı portal iske qosylady. Bul týraly Ónerkásip jáne qurylys vıtse-mınıstri Jánnat Dúbirova aıtyp berdi.
Jańa platforma qoldanystaǵy júıelerdi biriktiredi jáne eGov biryńǵaı avtorızatsııasy arqyly ázirleýshiler úshin «bir tereze» qaǵıdatyn qamtamasyz etedi.
— Basty maqsat — rásimderdiń qaıtalanýyn boldyrmaý jáne merzimderdi qysqartý. Aldaǵy ýaqytta jobalardy saraptaýdy avtomattandyrý úshin jasandy ıntellekt elementterin paıdalaný josparlanýda, — dep atap ótti vıtse-mınıstr Kongress ortalyqta.
Atalǵan portal qoldanystaǵy salalyq júıelerdi, mysaly, Qala qurylysy kadastry aqparattyq júıesin, Saraptama portalyn jáne E-Qurylys qyzmetterin, sondaı-aq qurylysqa qatysty aqparattyq resýrstar men qyzmetterdi biriktiredi.
Mysaly respýblıkanyń 89 qalasynda qurylysqa arnalǵan bastapqy-ruqsat qujattaryn alý boıynsha memlekettik qyzmetter (sáýlet-josparlaý tapsyrmasy, ınjenerlik jelilerge qosylýǵa arnalǵan tehnıkalyq sharttar, eskızdik jobany kelisý), qurylys jobalaryn ázirleý protsesin tolyq tsıfrlandyrý, nysandy paıdalanýǵa berý aktisin jasaý jáne oǵan qol qoıý jáne basqa da qyzmetter bar.
«Bir tereze» qaǵıdaty egov.kz arqyly biryńǵaı avtorızatsııa engizý esebinen iske asyrylady. Bul paıdalanýshylarǵa júıeler arasynda qaıta tirkelmeı-aq erkin ótýge jáne qajetti qyzmetti alý betine tikeleı shyǵýǵa múmkindik beredi.
Ónerkásip jáne qurylys vıtse-mınıstri Qýandyq Qajkenov áleýmettik osal toptarǵa baspana alýda qandaı qoldaý kórsetilgenin aıtyp berdi.