Brent markaly munaı baǵasy 9 mamyrdan beri alǵash ret 63 dollarǵa deıin quldyrady
ASTANA. KAZINFORM — Tramptyń tarıftik saıasatyna qatysty belgisizdik pen OPEK+ tarapynan munaı óndirý kóleminiń artýy kútilip otyrǵany baǵalarǵa qysym kórsetip otyr, dep jazdy Qazaqstan qarjygerler qaýymdastyǵy.
Valıýta naryǵy
Beısenbi kúngi saýda qorytyndysy boıynsha USD/KZT baǵamy 3,31 teńgege tómendep, 1 dollar – 509,12 teńge boldy. Bul rette saýda kólemi 248,4 mln dollarǵa deıin artty, aldyńǵy sessııada ol 197,9 mln dollar bolǵan.
Jalpy alǵanda syrtqy fon beıtarap bolǵanymen (munaı baǵasy men dollar ındeksiniń qatar ósýi), ulttyq valıýtanyń nyǵaıýyna ishki faktorlar kóbirek áser etken bolýy múmkin.
Teńgege qoldaý kórsetken yqtımal faktorlar:
• Ulttyq bank aldaǵy otyrysta bazalyq mólsherlemeni ózgerissiz qaldyrady degen úmit;
• Ulttyq bank, eksporttaýshylar jáne Qarjy mınıstrliginiń (KGS) shetel valıýtasyn satý kólemi kásiporyndar men halyq tarapynan bolǵan suranystan asyp tústi;
• Sonymen qatar, qazaqstandyq teńgeniń tarıhı túrde tyǵyz baılanysy bar reseı rýbliniń nyǵaıýy da oń áser etýi múmkin.
Munaı
Munaı baǵasy tómendeý úrdisin kórsetip otyr. Buǵan OPEK+ óndiristi arttyrady degen kútilister men Tramptyń tarıftik saıasatyna baılanysty belgisizdik áser etýde.
Osylaısha, beısenbi kúni Brent markaly munaıdyń baǵasy 63,4 dollarǵa deıin (-1,5%) tómendedi, al qazir 63 dollardan tómen tústi (-0,5%).
Sonymen qatar, Halyqaralyq energetıka agenttigi Qytaıdaǵy munaıǵa suranystyń tómendeýi týraly eskertý jasady.
Buǵan deıin biz habarlaǵandaı, Halyqaralyq valıýta qorynyń (HVQ) boljamyna sáıkes, eger munaı baǵasy tómen deńgeıde saqtalsa, 2025 jyly Qazaqstanda bıýdjet tapshylyǵy men tólem balansynyń defıtsıti ulǵaıýy múmkin.
Halyqaralyq valıýta qorynyń pikirinshe, Qazaqstanda qyzmet kórsetý, kólik, qurylys, óńdeý jáne óndirý ónerkásibi sektorlaryndaǵy joǵary belsendilik aıasynda joǵary ekonomıkalyq ósý saqtalyp otyr. Sondaı-aq, memlekettik ınfraqurylymdyq ınvestıtsııalardyń ósýi men tsıfrlyq tehnologııalar, JI, agroónerkásiptik keshen jáne logıstıka salasyndaǵy ınvestıtsııalyq jobalardyń iske asyrylýy baıqalady.