Brazılııa qus tumaýyna baılanysty EO-ǵa et eksporttaı almaıdy

ASTANA. KAZINFORM — Álemdegi eń iri qus eti eksporttaýshy el budan bylaı Eýropalyq Odaqqa qus jáne et ónimderin eksporttaı almaıdy. Buǵan sebep — eldegi qus tumaýynyń taralýy, dep habarlaıdy AZERTADJ

Bul týraly dúısenbi kúni Eýropalyq komıssııa málimdedi. Buǵan deıin, juma kúni, Brazılııa qus fabrıkasynda tumaý oshaǵynyń rastalǵanyn habarlaǵan bolatyn. Bul jańalyq Qytaı sekildi iri ımporttaýshy eldiń Brazılııamen saýdasyn ýaqytsha toqtatýyna jáne Japonııa syndy basqa da iri naryqtar úshin shekteýler engizilýine ákeldi, dep jazady Reuters.

— EO-ǵa ımport talaptary eksporttaýshy eldiń (Brazılııanyń) joǵary patogendi qus tumaýynan taza bolýyn qajet etedi, — dep málimdedi Eýrokomıssııa ókili elektrondyq hatynda.

Brazılııanyń aýyl sharýashylyǵy mınıstri Karlos Favaro juma kúni málimdegendeı, qoldanystaǵy hattamalarǵa sáıkes, Qytaı, Eýropalyq Odaq jáne Ońtústik Koreıa Brazılııadan qus etin 60 kúnge deıin ımporttaýǵa tyıym salady.

Alaıda, EO bul tyıymnyń naqty uzaqtyǵyn ataǵan joq. Komıssııa tek Rıý-Grandı-dý-Sýl shtatyndaǵy qus fermasynda anyqtalǵan indetten keıin Brazılııanyń HPAI-dan taza el mártebesi toqtatylǵanyn habarlady.

2024 jyly Brazılııa 5 mıllıon tonnadan astam qus etin eksporttaǵan, onyń shamamen 4,4%-y Eýropalyq Odaqqa jiberilgen, dep málimdedi Brazılııanyń janýar tekti aqýyzdar qaýymdastyǵy (ABPA).

Buǵan deıin Ledı Gaganyń Brazılııadaǵy kontsertinde jarylys bola jazdaǵany aıtyldy.