Brakoner: Túrkistan oblysynda 5 ekologııalyq qylmys áshkere boldy

KENTAÝ. QazAqparat - Túrkistan oblysynyń polıtseıleri brakonerlerden jabaıy qoıan tárkiledi, dep habarlaıdy QazAqparat obylstyq polıtsııa departamentine silteme jasap.

Jedel-profılaktıkalyq shara sheńberinde Kentaýdyń polıtsııa qyzmetkerleri jabaıy janýarlardy zańsyz aýlaýdyń kezekti deregin anyqtady.

Reıd kezinde tártip saqshylary Kentaý qalasynyń mańynda «VAZ-2106» markaly avtokólikti toqtatty. Kóliktiń ishinde eki jergilikti turǵyn boldy.

Avtokólik salonyn tintý kezinde polıtseıler eki ańshy myltyǵyn, projektor jáne atylǵan 4 jabaıy qoıandy taýyp tárkiledi. Atalǵan jaıt tirkeldi. Qazirgi ýaqytta atalmysh brakonerlik deregi boıynsha sotqa deıingi tergeý amaldary júrip jatyr.

Esterińizge sala keteıik, Túrkistan oblysy polıtsııa departamenti qyzmetkerleri «Brakoner» jedel-profılaktıkalyq sharasy barysynda 5 ekologııalyq qylmys, 400-den astam ákimshilik quqyq buzý faktisin jáne 14 ańshy qarýyn, 7 jabaıy ań men qus eti, sondaı-aq 200 kg jýyq balyq jáne 280 metrden astam balyq aýlaý jelilerin anyqtady.

Óz kezeginde polıtseıler azamattardy tabıǵatty qorǵaý zańnamasyn buzbaýǵa keńes beredi.