Bir ólip, bir tirildim: ózge júrekpen ómir súrip jatqan elorda turǵyny

ASTANA. KAZINFORM – Gúlmıra Smaılovanyń mamandyǵy pedagog-psıholog, qazir ol elordadaǵy júrek ortalyǵynda jumys isteıdi. 36 jastaǵy Astana turǵynynyń osydan 10 jyl buryn júregi aýystyryldy. Kazinform tilshisi ózge júrek ıesin áńgimege tartqan edi.

- Bıyl 1 maýsymda meniń júregimdi aýystyrǵanyna 10 jyl bolady. Mende júrek aqaýy 2010 jyly bastaldy, 2011 jyly Astana qalasyna emdelýge keldim, sol kezde dárigerler júrek aýystyrý kerek dep birden aıtty. Biraq ol kezde Qazaqstanda júrek otasy joq jáne qashan bolatynyn bilmedik. Sosyn maǵan apparat qoıdy, ıaǵnı jasandy júrek, sonymen 3,5 jyl júrdim, osy ýaqyt aralyǵynda meni donor tabyldy dep tórt ret shaqyrdy, biraq júrekti salýǵa týystary ruqsat bermeı ota jasalmady. Jalpy donor tabylǵanda bir ǵana emes, birneshe adamdy shaqyrady jáne júrektiń kimge keletinin kóredi. Árıne, júrek aýystyrý kerek degende qorqynysh boldy, sol úshin de elordaǵa kóship keldik, - dedi Gúlmıra Smaıylova.

Birneshe jyl jasandy júrekpen ómir súrgen Gúlmıraǵa 2015 jyly júrek donory tabylyp, ota jasaldy. Sodan beri jańa júrekpen ómir súrip jatyr.

- Donor Aqtóbe qalasynan, er adam, árıne, aldymen Allahtyń jazýymen jáne donordyń týystarynyń ruqsat berýimen jańa júrekke ıe boldym. Jaryq ómirdi otbasymmen birge súrip jatyrmyn. Ota elordadaǵy júrek ortalyǵynda tegin jasaldy. Ota qıyn, bir ólip, bir tirildim, kóp dári ishemiz. Kútimge kelsek, durys tamaqtaný jáne sportpen shuǵyldanǵan abzal, jıi jaıaý júrgen paıdaly. Jylyna bir ret kardıologııalyq em alyp turamyn, jaqynda ǵana kezekti em aldym. Otbasym bar, jalǵyz ulymdy tárbıelep otyrmyn, - deıdi ol.

Gúlmıra Smaıylovaǵa «er adamnyń júregimen ómir súrý qalaı eken, qandaı sezimdesiz?» degen saýal jıi qoıylady eken.

- Bul suraq jıi qoıylady, ıaǵnı er adamnyń júregi ǵoı, múmkin er adamnyń minez-qulqy, qylyqtary paıda boldy ma deıdi. Biraq eshqandaı ózgeris joq, sol baıaǵy óz qalpym. Endigi armanym, bir ólip-tirilgennen keıin paıdaly, maǵynaly ómir súrgim keledi. Donor men onyń jaqyndaryn da oılaımyn. Sebebi olar maǵan kelisimin berdi, men jaýaptymyn, - dep tolǵandy jańa júrek ıesi.

Aıta ketsek, osy kúnge deıin elimizde júz adamǵa donorlyq júrek qoıyldy. Alǵash elimizde júrek transplantatsııasy 2012 jyly 38 jastaǵy patsıentke jasaldy. Osy oraıda birer kún buryn elordada «Qazaqstandaǵy 100-shi júrek transplantatsııasy» forým ótti. 

Eske sala ketsek, Qazaqstanda transplantatsııa jasalatyn organǵa arnalǵan apparat synaqtan ótip jatyr. Onyń kómegimen donorlyq organdardy bir óńirden ekinshi óńirge qaýipsiz ári jyldam jetkizý múmkindigi bar. 

Elimizge tanymal dáriger ıÝrıı Pıa transplantatsııa tek medıtsına máselesi emes, qoǵamnyń ortaq problemasy deıdi. Onyń aıtýynsha, Qazaqstanda orta eseppen alǵanda 1 mıllıon adamǵa keminde 10 transplantatsııa qajet.