Elimizde bir aptada 750 keliden astam esirtki tárkilendi

ASTANA. KAZINFORM — Bir aptada 83 esirtki qylmysy anyqtalyp, 750 keliden astam tyıym salynǵan zat tárkilendi. Bul týraly Polisia.kz saıty habarlady.

QR Іshki ister mınıstrligi qoǵamdyq qaýipsizdik pen azamattardyń densaýlyǵyn qorǵaýǵa baǵyttalǵan "Zań jáne Tártip" qaǵıdatyn iske asyrýdy jalǵasyp jatyr.

Ótken apta ishinde eldiń túrli óńirlerinde esirtki qylmystaryna qarsy is-qımyl bólinisteriniń qyzmetkerleri esirtkiniń zańsyz aınalymyna qatysty birqatar quqyqbuzýshylyqty anyqtap, jolyn kesti.

Jalpy 83 esirtki qylmysy anyqtaldy. Onyń 63-i ótkizý deregi, 8-i asa iri kólemde saqtaý; 1 uıymdasqan qylmystyq top, 7-ýi quramynda esirtkisi bar ósimdikterdi ósirý.

Tárkilengen esirtki zattarynyń jalpy kólemi 750 keliden asty. Onyń ishinde 6 keliden astam sıntetıkalyq zattar alyndy, bul "qara naryqtaǵy" 18 myńnan astam dozaǵa teń.

Batys Qazaqstan oblysynda polıtsııa qyzmetkerleri Atyraý qalasynan a-pvp sıntetıkalyq esirtkisiniń iri partııasyn alyp kelgen 20 jáne 37 jastaǵy eki er adamdy ustady. Tergeý barysynda kúdiktilerdiń biriniń turǵylyqty mekenjaıynda 1,2 keliden astam sıntetıkalyq esirtki, sondaı-aq tarazy, qaptama materıaldary men býyp-túıýge arnalǵan quraldar tárkilendi.

Almaty qalasynda jedel is-sharalar barysynda 44 jastaǵy er adamnyń basqarýyndaǵy avtokólik toqtatylyp, júk salǵyshynan untaq tárizdi zat salynǵan tórt paket tabyldy. Saraptama nátıjesinde zattyń jalpy salmaǵy 1,35 keli mefedron ekeni anyqtaldy. Kúdiktiniń bul zattyń bir bóligin dostarymen birge tutynǵany, qalǵanyn shamamen 5 mln teńgege satýdy kózdegeni belgili boldy.

- Barlyq kúdiktiler ustalyp, ýaqytsha ustaý ızolıatoryna qamaldy. Esirtki qylmystarymen kúres jumystary júıeli túrde júrgizilýde jáne eldiń barlyq óńirlerin qamtı otyryp, qoǵamdyq tártip pen qaýipsizdikti qamtamasyz etýge baǵyttalǵan, - dedi ІІM Esirtki qylmysyna qarsy is-qımyl komıteti tóraǵasynyń orynbasary Qýandyq Áljanov.