Bos jatqan 12 myń gektar alqapqa sý jetkizip, baý-baqshaǵa aınaldyramyn - úzdik aýyl ákimi
Nurbaqyt Nurseıitov qyzmet atqaratyn «Jaýshyqum» aýyldyq okrýginde 5 eldi meken bar. Onda jalpy 2500-ǵa jýyq halyq turady.
Jergilikti turǵyndardyń basym bóligi aýyl shaýarshylyǵymen aınalysady. Tórt túlik ósirip, mal basyn kóbeıtip otyrǵandary da bar.
Búginde Nurbaqyt Nurseıitov aýyldaǵy 12 myń gektar alqapty sýlandyrý jobasyn qolǵa alyp otyr.
Shardara sý qoımasynan arnaıy sý júıesin tartyp, qurǵap jatqan úlken aýmaqty egistik alqabyna aınaldyrmaq.
Jas ákim bul jumysyn respýblıkalyq baıqaýda qorǵap shyqty. El ıgiligine arnalǵan jobany baıqaýdyń baqylaýshylary da joǵary baǵalady.
«Bizdiń aýyldyń halqy egin egip, mal basyn kóbeıtýge beıim keledi. Sondyqtan bos jatqan 12 192 gektar alqapqa sý jetkizý isin qolǵa alyp otyrmyn. Joba tolyq júzege asqan jaǵdaıda onda kókónister men jemis-jıdekter egip, mol ónim alýǵa bolady. Jylyjaı salyp, qysy–jazy halyqty kókónispen qamtı alamyz. Sondaı-aq, 10 000-ǵa jýyq jergilikti turǵyn jumyspen qamtylady. Islam damý bank arqyly jobany qorǵap, tabys kózine aınaldyrý maqsatynda júzege asyrsaq degen maqsatym bar», - deıdi aýyl ákimi.
Jalpy Nurbaqyt Dáýletbekulynyń aýyl ákimi qyzmetin atqaryp kele jatqanyna 5 jylǵa jýyq ýaqyt boldy.
Osy ýaqyt aralyǵynda aýyldyq okrýgtegi eldi mekender aýyz sýmen qamtamasyz etilgen. Joldar jóndelip, kóshelerdi jaryqtandyrý júıesi iske qosylǵan.
Saıabaq salynyp, balalar oıyn alańshasy jáne fýtbol, vorkaýt alańdary jumys isteı bastady.
Qylmys deńgeıi tómendegen Jaýshyqum qaýipsiz aýylǵa aınaldy.
«Aýylda halyqpen baılanys berik ornaǵan. Kúndelikti 24 saǵat baılanystamyn. Esigim árdaıym ashyq. Telefon nómirim kópshiliginde bar. Odan bólek, vatsap jelisinen aýyl halqyna ortaq chat ashqanbyz. Turǵyndar kez kelgen máseleni sonda kóterip, aıtyp otyrady. Al, oǵan nazar aýdaryp, keri baılanys ornatý - meniń basty mindetim», - deıdi Nurbaqyt Nurseıitov.
Eske sala keteıik, osy aptada elimizde «Úzdik aýyl ákimi» anyqtaldy.
Konkýrs qorytyndysy boıynsha Túrkistan oblysy Shardara aýdany Jaýshyqum aýyldyq okrýginiń ákimi Nurbaqyt Dáýletbekuly Nurseıitov «Úzdik aýyl ákimi» ataǵyn jeńip alǵan edi.
Ekinshi oryndy Pavlodar oblysy Ýspen aýdany Novopokrovsk aýyldyq okrýginiń ákimi Vıacheslav Nıkolaevıch Sımonenko, úshinshi oryndy Aqtóbe oblysy Shalqar aýdany Aıshýaq aýyldyq okrýginiń ákimi Oralbek Ábshanuly Ábshanov ıe boldy.
Sondaı-aq Shyǵys Qazaqstan oblysy Ulan aýdany Ablaket aýyldyq okrýginiń ákimi Aglanbekov Aryslan Orynbasaruly – «Úzdik sharýashyl ákim», Qaraǵandy oblysy Nura aýdany Barshyn aýyldyq okrýginiń ákimi Mýhanalıeva Zaýre Qazanbaıqyzy – «Ashyq ákim», Soltústik Qazaqstan oblysy Aqqaıyń aýdany Shaǵalaly aýyldyq okrýginiń ákimi Dobromırova Gúlmıra Orazbaıqyzy – «Úzdik áleýmettik joba» nomınatsııalaryn ıelendi.
Atap ótý kerek, konkýrsqa qatysý úshin elimizdiń túkpir-túkpirinen júzge jýyq aýyldyq okrýg ákimderi ótinim berdi.
Oblystardyń arasynda Qostanaıdan - 14 ákim, Soltústik Qazaqstannan - 12 , Jambyl oblysynan 12 ákim konkýrsqa ótinim berip, belsendilik tanytty.
Baıqaý eki kezeńde ótkizildi: óńirlik jáne respýblıkalyq.
Fotolardy keıipker usyndy
