Borıs Djonsonnyń basy taǵy daýǵa qaldy
Ulybrıtanııanyń burynǵy premer-mınıstri Borıs Djonsonnyń basyna taǵy da qara bult úıirildi. Ol úkimettiń pandemııaǵa qarsy áreketin tergeýge baǵyttalǵan tyńdaýlarǵa qatysyp, suraqtyń astynda qaldy. Bir jyldan astam ýaqyt buryn dál osy másele boıynsha saıasatker qyzmetinen qýylǵan bolatyn, dep habarlaıdy Kazinform tilshisi.
Borıs Djonson tyńdaýlarǵa 3 saǵat buryn tańmen talasa óte erte keldi. Aqparat quraldarynyń pikirinshe, ol kovıdten qaza tapqandardyń otbasylarymen kózbe-kóz kezdesip qalmaý úshin osylaı etken.
2019-2022 jyldar aralyǵynda úsh jyl premer-mınıstr qyzmetin atqarǵan Djonsonnyń basy daýǵa qalyp, otstavkaǵa ketken bolatyn. Buǵan koronavırýs pandemııasy órship turǵanda Daýnıng strıtte toı toılap, áriptesterimen birge ishimdik ishkeni sebep boldy. Al dál sol kezde halyq úkimettiń aıtqanyn istep, úıden shyqpaı otyrǵan edi. Endi osy qylyǵy úshin saıasatker ókinetinin aıtyp otyr.
“Kovıd qurbandary men olardyń otbasylarynan keshirim suraǵym keledi. Men olardyń jan jarasyn jaqsy túsinemin. Otbasy múshelerinen aıyrylǵan adamdarǵa qaıǵyryp kóńil aıtamyn”, - dedi Borıs Djonson.
Tyńdaýlardyń tynysh ótýine kedergi bolǵandar - kovıdten jaqyndaryn joǵaltqan adamdar zaldan tártipke bas ımegeni úshin syrtqa shyǵaryldy. Qoldarynda qaıtys bolǵan aǵaıyn-týystarynyń sýretterin jáne Djonsondy aıyptaǵan urandaryn ustaǵan narazy top dalada turyp, qaıǵy-muńdarymen bólisti. Olar kúızelistiń jandaryn jegideı jep júrgenin aıtady.
“Nege bulaı bolǵanyn bilgim keledi. Nelikten ol koronavırýstyń birinshi tolqynynan keıin qatelikterden sabaq almady? Nege ol erterek lokdaýn jarııalamady? Nelikten meniń anam qaıtys boldy?”, - deıdi Kent qalasynyń turǵyny Sharlotta Lınch.
“Ol buryn-sońdy bolmaǵan, beıbit ýaqyttaǵy eń úlken tragedııalardyń biri kezinde basshy bolǵan premer-mınıstr retinde este qalady. Ol abyroıyn aırandaı tógip, masqara bolǵan adam. Men kovıd kezinde ata-anamnan aıyryldym”, - deıdi London turǵyny Djın Adamson.
Pandemııa Ulybrıtanııada 230 000-nan astam adamnyń ómirin qıdy jáne mıllıondaǵan adamǵa juǵyp, naýqas qyldy. Olardyń 58 paıyzy 80 jastan asqan qarııalar. Bul - Eýropadaǵy eń joǵarǵy kórsetkishterdiń biri. Borıs Djonsonnyń pikirinshe, ózi basqarǵan úkimet pen onyń keńesshileri problemanyń aýqymy men taralý qarqynyn jete baǵalamaǵan.
“Eger biz matematıkalyq turǵyda jasalǵan keıbir boljamdarǵa jetkilikti deńgeıde nazar aýdarǵanymyzda, basqasha áreketer me edik?”, - dedi Borıs Djonson.
Jaqyndary qaıtys bolǵandardyń advokattarynyń Djonsonǵa qoıar suraǵy kóp. Olardyń paıymdaýynsha, saıasatker jazasyz qalatynyn bilip, adamdardyń taǵdyrymen oınaǵan. Jumys istemeıtin testileý jáne naýqastardy baqylaý júıesine 37 mıllıard fýnt qurtyp, jaýapkershilikti moınyna almaı otyr-mys.
“Ol shyndyqty aıtýy kerek. Djonsonnyń osal toptaǵy adamdarǵa jáne kedeı-kepshikterge degen kózqarasy, qart kisilerdi qorlap jazǵan elektrondyq hat almasýlary, WhatsApp habarlamalary bar. Ol óz áreketi úshin esep berýi kerek”, - deıdi advokat Aamer Anvar.
Saıasatkerdiń jaýaptary kópshilikti tań qaldyrdy. Ol halyqtan keshirim suraı otyryp, óz isterin túgeldeı aqtap alýǵa tyrysty. Djonson premerlikten qýylǵannan keıin depýtattyq mandatymen de qosh aıtysýyna týra keldi. Qazir ol kúndelikti taraıtyn brıtanııalyq Daily Mail gazetiniń sholýshysy qyzmetin atqarady.
