Bopsalaýǵa, qorqytýǵa tez kóngish – maman jasóspirimderdiń esirtki taratýy týraly

ASTANA. KAZINFORM – Elimizde 14 jastan asqan balalardyń esirtki tasymaldaǵany boıynsha birneshe derek tirkeldi. Olarǵa qandaı shara qoldanylady? 

ІІM Esirtki qylmysyna qarsy is-qımyl komıtetiniń asa mańyzdy ister jónindegi aǵa jedel ýákili Medetbek Smaǵulovtyń aıtýynsha, esirtki tasymaldaýshylardyń kóbi – 16-32 jastaǵylar.

– Biraq qazir 14 jastan asqan balalardyń da esirtki tasymaldaǵany týraly birneshe fakt tirkeldi. Óıtkeni, olar bopsalaýǵa, qorqytýǵa tez kóngish. Bizde adam quqylarynyń jalpyǵa birdeı deklaratsııasy bar. Ol jerde 18 jasqa deıingi azamattar bala dep esepteledi. Degenmen esirtki tasymalymen aınalysqan jaǵdaıda 16 jastan bastap qylmystyq jaýapkershilikke tartylady. Al eger asa aýyr qylmys jasap, tarmaqtary naqty anyqtalatyn bolsa, 14 jastan bastap qylmystyq jaýapkershilikke tartylady, - deıdi spıker.

Sondaı-aq Medetbek Smaǵulov jastar arasynda keń taraǵan esirtki túrine de jeke toqtaldy.

– Esirtki túrleriniń arasynda álemge kóp taraǵany - sıntetıkalyq ónim. Bul - kannabıstik ónimniń ornyna kelgen dári-dármektik deńgeıdegi preparattar.
Sıntetıkamen kúresý óte qıyn. Biz buryn kannabıstik esirtkiniń baǵyt-baǵdaryn, jolyn biletin edik. Qazir sıntetıkalyq esirtki kez kelgen úıde daıyndala beredi. Formýlalaryn daıyndap, prekýrsorlaryn alatyn bolsa, jetkilikti.

Sıntetıkalyq esirtki – óte aýyr ónimderdiń biri. Ekinshi qoldanǵannan-aq adam táýeldi bolyp qalady. Sıntetıkalyq esirtkini joıýǵa ata-analar da belsendi aralasý kerek. Óıtkeni jastardyń arasynda óte kóp tarap kele jatyr, - deıdi Medetbek Smaǵulov. 

Aıta ketsek, jaqynda polıtsııa qyzmetkerleri bir kún ishinde Batys Qazaqstan, Soltústik Qazaqstan jáne Qaraǵandy oblystarynda ornalasqan úsh esirtki zerthanasyn joıdy.