Bomba týraly jalǵan habar beretinder arasynda jumyssyzdar basym

NUR-SULTAN. QazAqparat – Jarylǵysh zat týraly jalǵan aqparat taratatyndar arasynda jumyssyzdar basym. Bul týraly QR ІІM Ekstremızmge qarsy is-qımyl departamenti basqarma bastyǵynyń orynbasary Spartak Qabdenov aıtty, dep habarlaıdy QazAqparat tilshisi.

«Jarylǵysh zat qoıylǵany týraly jalǵan aqparat joldaý - jaı ǵana buzaqylyq emes, qylmys bolyp sanalady. Óıtkeni, jalǵan habar taratqan adam aqparatty joldaǵannan keıin qylmys jasalǵan dep sanalady. Telefonmen habarlaıtyn buzaqylyqtyń basym bóligi mas kúıde jasalady. Mysaly, 2022 jyldyń 5 aıynda isteri sotqa joldanǵan 12 adamnyń 11-i qylmysty mas kúıinde jasaǵan. Sondaı-aq qylmystyń 80 paıyzdan astamyn, ıaǵnı, ashylǵan 19 qylmystyń 15-in jumysy joqtar jasaǵan», - dedi ol mınıstrliktiń baspasóz alańynda ótken brıfıngte.

Onyń atap ótýinshe, sońǵy ýaqytta áleýmettik jelilerdiń, messendjerlerdiń, basqa da aqparattyq tehnologııanyń damýyna baılanysty jalǵan habardyń ınternet arqyly joldanýy kúrt ósken.

«Osy jyldyń 5 aıynda elektrondyq habarlama joldaýǵa qatysty 35 qylmystyq is qozǵaldy. Onyń barlyǵy adam kóp jınalatyn áýejaı, temir jol vokzaly, memlekettik organ ǵımarattary syndy nysandardyń elektrondy poshtasyna joldanǵan», - dedi Spartak Qabdenov.