Bólshek saýda kólemi 6,9% ósti

ASTANA. KAZINFORM — 2025 jylǵy qańtar-tamyz aralyǵynda bólshek saýda kólemi 14 805,9 mlrd teńge bolyp, ótken jyldyń sáıkes kezeńimen salystyrǵanda 6,9%-ǵa artty. Bul týraly Ulttyq statıstıka bıýrosynyń baspasóz qyzmeti habarlady. 

Saýda kásiporyndary arqyly taýarlardyń bólshek saýdada ótkizilýi 10 234,3 mlrd teńge bolyp, bir jylda 6,3% ósti.

Jalpy bólshek saýda kóleminde azyq-túlik taýarlarynyń úlesi 31,9% bolsa, azyq-túlikke jatpaıtyn taýarlardiki — 68,1%.

— Saýda kólemindegi eń joǵary ósim azyq-túlikke jatpaıtyn taýarlar boıynsha baıqaldy. Atap aıtqanda, motor otyny, avtomobılder, elektrli turmystyq tehnıka, farmatsevtıka ónimderi, azyq-túlik taýarlary, sýsyndar men temeki ónimderi, toqyma jáne shulyq buıymdary, kosmetıka taýarlary men jeke gıgıena zattary, kompıýterler, perıferııalyq jabdyqtar jáne baǵdarlamalyq qamtamasyz etý boıynsha saýda artty, — delingen habarlamada.

2025 jylǵy 1 qyrkúıektegi jaǵdaı boıynsha bólshek saýda kásiporyndarynyń (esep bergen kásiporyndar boıynsha) taýar qory 1 588,2 mlrd teńge boldy, bul 56 kúndik saýda mólsheri.

Respýblıkadaǵy bólshek saýdanyń eń úlken úlesi Almaty (32,4%) men Astana qalalaryna (13,8%), Qaraǵandy (7,3%) jáne Shyǵys Qazaqstan oblysyna (5,6%) tıesili.

Aıta ketelik Saýda mınıstrligi baǵa turaqtylyǵyn baqylaýdy kúsheıtpek.