Bolgarııamen qarym-qatynas jańa satyǵa kóteriledi - Janseıit Túımebaev
Qos taraptyń kezdesýine etnomádenı ortalyqtardyń ókilderi de qatysty. Bolgarııa Respýblıkasynyń delegatsııasyn bastap kelgen Ilııana Iotova resmı basqosý aldynda Dostyq úıin aralap, qazaqtyń ulttyq dástúriniń kóne jádigerlerin tamashalady. Ol bir shańyraq astynda tútin tútetken etnostardyń tól mádenıeti pen týǵan tilderin saqtaýǵa, damytýǵa berilgen múmkindiktiń keńdigine tańdandy.
Qazaqstan halqy Assambleıasy Tóraǵasynyń orynbasary J.Túımebaev óz sózinde Qazaqstanda 4 myń 523 bolgar turatynyn, olardyń alǵashqy qonys aýdarýy Ýkraına men Bessarabııadan 20 ǵasyr basyndaǵy Stolypın reformasynan keıin bastalǵanyn atap ótti. Sondaı-aq Nur-Sultan, Pavlodar, Atyraý, Aqtóbe jáne Qaraǵandy oblystarynda bolgar tilin, mádenıeti men ulttyq dástúrlerin saqtaý maqsatynda Bolgar mádenı ortalyqtary ashylǵanyn jetkizdi.
Qazaqstan men Bolgarııa múddeles jáne odaqtas memleketter ekenin aıta kele, Qazaqstan Prezıdenti Qasym-Jomart Toqaevtyń Bolgarııadaǵy Qazaqstan dıplomatııalyq mıssııasyn Elshilik retinde qaıta qurý týraly sheshimi eki el qarym-qatynasyn jańa satyǵa kóteretinine toqtaldy. Sonyń ishinde bilim, sport, mádenıet salasynyń qarqyndy damıtynyna senim bildirdi.
Esterińizge sala ketsek, Qazaqstan men Bolgarııa dıplomatııalyq qatynastardy ornatý týraly hattamaǵa 1992 jylǵy qol qoıyp, 1994 jyly Bolgarııa elshiligi ashyldy. 1993 jyly alǵash ret Bolgarııa Prezıdenti J.Jelev – Qazaqstanǵa, 1999 jylǵy qyrkúıekte Tuńǵysh Prezıdent N.Nazarbaev Sofııaǵa is-saparmen bardy.
Qazirgi tańda bolgar tarapynyń qatysýymen elimizde 80-ge jýyq kompanııa tirkelgen. Bolgarııada 35-ke jýyq qazaqstandyq kompanııa jumys isteıdi. QHA quramynda 4 bolgar etnomádenı birlestigi bar. Barlyq ortalyqtar Qazaqstan halqy Assambleıasy ótkizetin mádenı is-sharalarǵa turaqty qatysady.
Bolgarııa vıtse-prezıdenti I.Iotova óz kezeginde Qazaqstanda bolgarlardyń tilin, dástúrin saqtaýyna barlyq qolaıly jaǵdaı jasalǵandyǵyna rızashylyǵyn bildirip, qazaqstandyq bolgar jastaryn tarıhı otandarynda tegin bilim alýǵa shaqyrdy.
Sondaı-aq, «Dossyz ómir – tuzsyz as» degen qazaqtyń kóne maqalyn esine alǵan Ilııana Iotova álemniń keıbir elderinde saıası jaǵdaı ýshyǵyp turǵan búgingi kezeńde jastardy toleranttylyq pen beıbitsúıgishtilik qasıette tárbıeleý mańyzdy dedi.
Kezdesý sońynda Janseıit Qanseıituly bolgar delegatsııasynyń basshysyna eldegi birliktiń sımvoly Shańyraq músinin syıǵa tartty. Bolgarlyqtar da qurqol kelmepti, olar dostyqtyń uıytqysy bolǵan Assambleıaǵa bolgar ejelgi álipbıiniń quımasyn tartý etti.
