Bolat Aqsholaqov: Ekibastuzdaǵy apat – keshendi qatelik
«Ekibastuzdaǵy apat – keshendi qatelik. Oǵan stantsııa bastyǵy nemese ınjener ǵana kináli dep aıta almaımyn. JEO-da qysymdy kórsetetin esepteý quraldarynyń metrologııasyna qatysty suraqtar boldy. Menińshe, datchıkterdiń burys kórsetkishinen keıin mamandar qysymdy joǵarylatýǵa kirisken. Sóıtip, jylý jelilerindegi qysym artty, al tozyǵy jetken jeli oǵan tótep bere almady. Kommýnaldyq qyzmet shuǵyl shara qabyldamady. Mine, osylardyń kesirinen turǵyn úıler jylýsyz qaldy. Turǵyn úılerdiń jylý qubyrlary men radıatorlar zaqymdandy. Endi olardy tolyǵymen aýystyrý qajet», - dedi Bolat Aqsholaqov OKQ-de ótken baspasóz máslıhatynda.
Mınıstrdiń aıtýynsha, energetıka mınıstrligi generatsııa men tikeleı stantsııaǵa jaýapty. Al, jylý jelileri kommýnaldyq qyzmettiń jaýapkershiliginde.
Eske salsaq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy. 28 qarasha kúni tańerteń qalada jergilikti aýqymdaǵy tótenshe jaǵdaı jarııalandy.
Bas prokýratýra Ekibastuzdaǵy apatty tergeý eki aıǵa deıin sozylatynyn málim etti.
Foto: «Pavlodarenergo» AQ
