Bolashaqta aqyn bolǵym keledi - Qadyrdyń 400-den astam óleńin jattaǵan oqýshy
Qazaqtyń uly aqyny Qadyr Myrza Álıdiń týǵan jeri - Syrym aýdanynda osymen ekinshi ret uıymdastyrylǵan dástúrli baıqaýǵa respýblıka óńirleri men Nur-Sultan, Almaty, Shymkent qalalarynan barlyǵy 38 oqýshy qatysyp, baq synady.
Syrymdyq oqýshy T.Maratov «Sózdiń bári qudiretti...» atty aqyn shyǵarmalaryn jatqa oqýdan bas júldege ıe boldy. Qazylar alqasynyń múshesi, ardager-ustaz Ótebaı Quspanovtyń sózine qaraǵanda, jyl sanap aıasy keńip kele jatqan baıqaýdyń bıylǵy jańalyǵy dál osy Temirlan boldy.
Temirlan Qadyr babasynyń 401 óleńine qosa «Qyzyl kitap» poemasyn túgel jattap alǵan eken. Muny rekordtyq nátıje deýge bolady.
Óziniń aıtýynsha, aqyn óleńderin 2-synyptan bastap jattap keledi eken.
«Birinshi synyptan oqý ozatymyn. Meni osy ónerge bastapqyda baýlyǵan alǵashqy muǵalimim mekteptegi úlgili ustazdyń biri Qarasha Amangeldiqyzy Nadırova edi. Qazir qazaq tili men ádebıetinen joǵary sanatty ustaz Samal Taýfıqqyzy Batyrova tálim berip keledi. Meniń maqsatym - aldaǵy jyldary batyrlar jyryn jatqa aıtýdan jarystarǵa qatysý. Al óskende aqyn, jazýshy bolǵym keledi. Ár nárseniń qaıyrymy bar, tórt jylǵy eńbegimniń jemisin kórip jatyrmyn», dedi QazAqparat tilshisine Temirlan Maratov.
Qadyr óleńderin jatqa oqýdan sondaı-aq Almaty oblysy Óskeldi aýdanynan kelgen Gaýhar Turǵanbaı birinshi, Túrkistan oblysy Maqtaaral aýdany Úlgili orta mektebinen Danııar Turlybek pen BQO Jańaqala aýdany Á.Jangeldın atyndaǵy mektepten Merhat Nazımov ekinshi, Nur-Sultan qalasy №61 mektebinen Dana Abzalqyzy men Qyzylorda oblysy Shıeli aýdany №44 mektebinen Bekzathan Mahambet úshinshi orynnan kórindi.
«Keıbir jyrym dán ushyryp qyrmanda, keıbir jyrym baqtashy bop júr mańda...» atty aqynnyń sózine jazylǵan ánderdi oryndaý bóliminde Mańǵystaý oblysy Munaıly aýdany №9 mektepten kelgen jas ánshi Jomart Maratov bas júldeni jeńip aldy. Elordalyq №69 mektep-gımnazııasynan Aqjol Sabıǵat birinshi, Atyraý oblysy I.Taımanov atyndaǵy mektepten Amanbek Qapsalımov, Túrkistan oblysy Ordabasy aýdanynan Nurqoja Saǵathan ekinshi, Almaty qalasy Alataý aýdany №182 mektepten Baqtııar Zeınelhan, BQO Báıterek aýdany Úlken Shaǵan mektebinen Jasmın Jeńis úshinshi júldege ıe boldy.
«Qýyp shyǵar qyzyl sózdi oı keıin...» atty Qadyrǵa arnalǵan shyǵarmalaryn oqý saıysynda Oral qalasyndaǵy daryndy balalarǵa arnalǵan mamandandyrylǵan S.Seıfýllın atyndaǵy №11 oblystyq qazaq mektep-ınternat kesheniniń oqýshysy Aqgúlim Erbolova úzdik shyqty. Elordalyq Qajymurat Tabysbek birinshi, Almaty oblysy Panfılov aýdanynan Alýa Asqar men qyzylordalyq Janel Jaıyq ekinshi, jańaózendik Ásel Rymbaeva men Jambyl oblysy Jambyl aýdanynan kelgen Mereıhan Raıymbaev úshinshi orynǵa laıyq dep tabyldy.
Eske sala keteıik, budan buryn batysqazaqstandyq oqýshynyń Qadyr Myrza Álıdiń 355 óleńin jatqa oqıtynyn jazǵan bolatynbyz.
