«Bolashaq» jáne «Ǵylymı taǵylymdamalar» stıpendııasyna qujat qabyldaý bastaldy

ASTANA. KAZINFORM – «Halyqaralyq baǵdarlamalar ortalyǵy» AQ qujat qabyldaý 3 naýryzdan bastalatynyn habarlady. 

«Болашақ» және «Ғылыми тағылымдамалар» стипендиясына құжат қабылдау басталды
Фото: «Халықаралық бағдарламалар орталығы» АҚ

«Bolashaq» baǵdarlamasy boıynsha stıpendııa taǵaıyndaýǵa arnalǵan konkýrstyq irikteýge qatysý úshin qujat qabyldaý 3 naýryzda bastalyp 17 qazanda aıaqtalady.

Konkýrstyq irikteý 2025 jylǵy 1 sáýir men 31 jeltoqsan aralyǵynda ótedi. «Bolashaq» stıpendııasyna qujat egov.kz portaly arqyly qabyldanady. Shetelde kadrlar daıarlaý kezinde ınjenerlik-tehnıkalyq jáne medıtsınalyq mamandyqtarǵa basymdyq beriledi.

2025 jyly «Bolashaq» baǵdarlamasy boıynsha oqý úshin 645 stıpendııa bólindi. Onyń ishinde magıstratýra baǵdarlamasy boıynsha – 411 stıpendııa, doktorantýra/rezıdentýra boıynsha – 41 stıpendııa, taǵylymdamalar boıynsha – 193 stıpendııa.

Basym mamandyqtar tizbesi halyqty áleýmettik qorǵaý salasyndaǵy ýákiletti memlekettik organnyń kadrlarǵa ekonomıkanyń qajettiligi boljamyn eskere otyryp, ortalyq jáne jergilikti memlekettik organdardyń ótinimderi negizinde qalyptastyryldy. 

«Bolashaq» baǵdarlamasy sheńberinde stıpendııa taǵaıyndaý úshin mynadaı kvota sanattary kózdelgen: ınjenerlik-tehnıkalyq qyzmetkerler, medıtsına qyzmetkerleri, aýyldyq eldimekennen shyqqan úmitkerler, sondaı-aq memlekettik qyzmetshiler. «Bolashaq» halyqaralyq stıpendııasynyń kvota sanatyndaǵy stıpendıattarynyń stıpendııa esebinen tildik daıarlyqtan ótýge, sondaı-aq ony taǵaıyndaǵannan keıin sheteldik JOO-ǵa túsýge múmkindigi bar.

Buǵan qosa, Shetelde kadrlar daıarlaý jónindegi Respýblıkalyq komıssııa 2025 jylǵa «Bolashaq» baǵdarlamasy boıynsha taǵylymdamadan ótý úshin qyzmetkerlerdiń mynadaı sanattaryn bekitti:

  1. ınjenerlik-tehnıkalyq qyzmetkerler, agroónerkásiptik keshen salasynyń qyzmetkerleri, jasandy ıntellekt boıynsha mamandar;
  2. mektepke deıingi, orta, tehnıkalyq jáne kásiptik bilim berý uıymdarynyń pedagogteri, joǵary jáne (nemese) joǵary oqý ornynan keıingi bilim berý uıymdarynyń pedagogteri men qyzmetkerleri;
  3. medıtsına qyzmetkerleri;
  4. memlekettik qyzmetshiler;
  5. buqaralyq aqparat quraldarynyń qyzmetkerleri;
  6. mádenıet, týrızm jáne sport salasynyń qyzmetkerleri;
  7. sýdıa jáne sot qyzmetkerleri.

Al «Ǵylymı taǵylymdamalar» baǵdarlamasy boıynsha stıpendııa taǵaıyndaýǵa arnalǵan konkýrstyq irikteýge qatysý úshin qujat qabyldaý 3 naýryzda bastalyp 31 qazanda aıaqtalady.

Konkýrstyq irikteý 2025 jylǵy 1 sáýir men 31 jeltoqsan aralyǵynda ótedi. «Ǵylymı taǵylymdamalar» baǵdarlamasy boıynsha ótinim qabyldaý Astana qalasy, Syǵanaq kóshesi, 70 mekenjaıynda ornalasqan «Halyqaralyq baǵdarlamalar ortalyǵy» AQ keńsesiniń 5-qabatynda 508-kabınette júrgiziledi. Shetelde kadrlar daıarlaý kezinde ınjenerlik-tehnıkalyq jáne medıtsınalyq mamandyqtarǵa basymdyq beriledi.

Basqa qaladan kelgen úmitkerlerge qujatty senimhat arqyly tapsyrý múmkindigi beriledi.

«Ǵylymı taǵylymdamalar» baǵdarlamasy Memleket basshysynyń tapsyrmasyna sáıkes, álemniń jetekshi ǵylymı ortalyqtarynda qazaqstandyq ǵalymdardyń biliktiligin arttyrý maqsatynda bekitildi. Ǵylymı taǵylymdamalar baǵdarlamasy boıynsha 2025 jylǵa 250 stıpendııa bólindi.

Eske sala keteıik, buǵan deıin «Bolashaq» baǵdarlamasyndaǵy ózgerister, mınıstrlik bekitken jańa erejelerdi jazǵan bolatynbyz.

Сейчас читают