Bolashaq zańgerlerdiń 97 paıyzy aqyly bilim alyp jatyr
ASTANA. KAZINFORM – Búginde zańger mamandyǵy boıynsha joǵary bilim alyp jatqan jastardyń 97 paıyzy aqyly negizde oqıdy. Bul týraly Senatta ótip jatqan parlamenttik tyńdaýda Ǵylym jáne joǵary bilim mınıstri Saıasat Nurbek aıtty.
- Qazirgi ýaqytta zań salasyndaǵy 59 joǵary oqý ornynda 40 myńǵa jýyq bilim alýshy oqıdy.
Bul burynnan qalyptasqan úderis. 1992 jyldardyń basynda gýmanıtarlyq býyn bolǵan edi. Kóptegen bala, ata-analar gýmanıtarlyq baǵytqa mán bergen. Búginde naqty memlekettik tapsyrys alatyn jáne zań salasynda kadr daıyndaıtyn JOO-lar tizimi 13-ke deıin qysqardy. Bilim alyp jatqan 40 myńǵa jýyq stýdenttiń basym bóligi – 30 myńǵa jýyǵy bakalavrıat stýdentteri. Magıstratýra men doktorantýrada oqıtyndardyń sany 5,5 paıyzdy quraıdy, mangıstratýrada – 1 996, doktorantýrada – 163 adam, - dedi mınıstr.
Onyń atap ótýinshe, ótken jyldan bastap zań baǵytynda bilim beretin joǵary oqý oryndaryna qoıylatyn talap kúsheıtildi. Endigi ýaqytta olarda krımınalıstıkalyq polıgon, zań klınalıkalary bolýy tıis. Sonymen qatar professor-oqytýshylar quramynyń basym bóliginde praktıkalyq tájirıbe bolýy qajet.
- Sońǵy 4 jylda zań baǵyty boıynsha bilim alýǵa 1 656 grant bólindi. Ózderińiz biletindeı, bul baǵytta bilim alý úshin talapkerlerge qoıylatyn talap kúsheıtilgen. Aqyly oqý úshin de UBT baly keminde 75 ball bolýy kerek. Buryn shekti ball 50 bolatyn. Zańger bolýǵa nıetti daryndy jastar sany óte kóp. Áli osy úrdis kele jatyr. Grant sanyn qysqartsaqta 97 paıyzy aqyly túrde bilim alady. Stýdentterdiń shákirtaqylary 2022 jylmen salystyrǵanda 2 esege artty. Búginde stýdentterdiń shákirtaqysy 55 myń teńge shamasynda, magıstranttarda 85 myń teńge shamasynda, al doktoranttar 265 myń teńge alady. Qazir magıstratýra, doktorantýraǵa basa mán bergimiz keledi. Zań ǵylymy, krımınalıstıka, jasandy ınıtellekt, tsıfrlyq quqyq salasynda ǵalymdar óte az. Sondyqtan ǵylymǵa jastar kóbirek kelýi úshin qarjylaı da yntalandyrý sharalaryn qabyldap jatyrmyz, - dedi Saıasat Nurbek.
Buǵan deıin Senat tóraǵasy Máýlen Áshimbaev zań salasyndaǵy mamandardyń sany bar da sapasy joq ekenin aıtqan bolatyn.