«Bolashaq» stıpendııasyna qujat qabyldaý bastalady
ASTANA. KAZINFORM – Bıyl «Bolashaq» halyqaralyq stıpendııasyna jáne «500 ǵalym» ǵylymı taǵylymdamasyna qujattardy qabyldaý úzdiksiz júrgiziledi. Qujattardy qabyldaý 29 sáýirde bastalyp, 25 qazanda aıaqtalady.
Konkýrstyq irikteý 10 mamyrdan 30 qarashaǵa deıin ótedi. «Bolashaq» stıpendııasyna qujattar egov.kz. portaly arqyly qabyldanady. Al «500 ǵalym» boıynsha ótinimderdi qabyldaý jáne konkýrstyq irikteý alǵash ret bolashak.gov.kz. portalynda «Úmitkerdiń jeke kabıneti» bóliminde onlaın júrgiziledi. Shetelde kadr daıarlaý kezinde ınjenerlik-tehnıkalyq jáne medıtsınalyq mamandyqtarǵa basymdyq beriledi.
2024 jyly «Bolashaq» baǵdarlamasymen bilim alýǵa 555 stıpendııa bólindi. Onyń ishinde 395 stıpendııa magıstratýra jáne rezıdentýraǵa, doktorantýra baǵdarlamalary boıynsha – 50 stıpendııa, taǵylymdamadan ótý úshin 110 stıpendııa bólingen.
Basym mamandyqtar tizimi ortalyq jáne jergilikti memlekettik organdardyń ótinimderi, qysqamerzimdi jáne uzaqmerzimdi damý strategııalary men josparlary boıynsha qurylǵan. Úmitkerler sý qaýipsizdigi jáne sý burý, agroorman sharýashylyǵy, qurylys, agroónerkásip, jasandy ıntellekt, molekýlalyq genetıka sııaqty ózekti mamandyqtar boıynsha shetelde daıyndyqtan óte alady.
«Bolashaq» stıpendııasy boıynsha kvotalyq sanattar qarastyrylǵan. Olar – ınjenerlik-tehnıkalyq qyzmetkerler, medıtsınalyq mamandar jáne aýyldyq jerlerden kandıdattar. Kvotalyq sanattaǵy úmitkerler tegin tildik daıyndyqtan óte alady. Sondaı-aq qujattardy tapsyrý kezinde sheteldik joǵary oqý ornyna óz betinshe túsýdiń qajeti joq. Olar stıpendııa taǵaıyndalǵannan keıin oqý ornyn tańdaı alady.
«500 ǵalym» baǵdarlamasy álemniń jetekshi ǵylymı ortalyqtarynda qazaqstandyq ǵalymdardyń biliktiligin arttyrý maqsatynda Memleket basshysynyń tapsyrmasyna sáıkes bekitildi. Ǵylymı taǵylymdamalar baǵdarlamasy boıynsha jyl saıyn 500 stıpendııa bólinedi.
«Memleket akademııalyq oqýǵa, taǵylymdamadan ótýge, ushýǵa, medıtsınalyq saqtandyrýǵa, vızalyq alymdarǵa, oqý materıaldaryn satyp alýǵa jumsalatyn shyǵyndardy jabady. Sondaı-aq aı saıynǵy stıpendııa tólenedi. Úmitkerlerge qoıylatyn talaptarmen, basym mamandyqtar tizbesimen, ýnıversıtetter men ǵylymı ortalyqtardyń tizimimen bolashak.gov.kz. saıtynda tanysýǵa bolady», - dep habarlady Halyqaralyq baǵdarlamalar ortalyǵy.
