«Bolashaq» stıpendııasy ádil berile me — Qusmanov jaýaby

ASTANA. KAZINFORM — «Bolashaq» baǵdarlamasynda kásibı tájirıbe men akademııalyq jetistikter qatar eskeriledi, al irikteý protsesi ashyq ótedi.

Bul týraly «Halyqaralyq baǵdarlamalar ortalyǵy» AQ basqarma tóraǵasy Ádil Qusmanov Jibek joly telearnasyndaǵy «Ýáde» baǵdarlamasyna bergen eksklıýzıvti suhbatynda aıtyp berdi. 

Ádil Qusmanov akademııalyq kórsetkishterdiń kásibı tájirıbeden basym bolýy týraly suraqqa jaýap berdi jáne úmitkerler keshendi turǵyda qaralatynyn atap ótti.

— Bizde kásibı tájirıbe de, akademııalyq jetistikter de esepke alynady. Táýelsiz sarapshylar komıssııasy árbir úmitkerge tutas, holıstıkalyq túrde qaraıdy. Biz eńbek ótiline, til deńgeıine, násilge, áleýmettik mártebege baılanysty eshkimdi shettetpeımiz, — dedi ol.

Onyń aıtýynsha, magıstratýra, doktorantýra, taǵylymdama baǵyttaryna qaraı, mınımaldy talaptar qoıylǵan. Mysaly, taǵylymdama úshin eń kemi úsh jyldyq kásibı tájirıbe qajet. 

— Keıde bizdegi aǵa býyn ókilderiniń aǵylshyn tili deńgeıi jetpeı qalsa, olar komıssııa tarapynan ádiletsizdik boldy dep oılaýy múmkin. Biraq shyn máninde, biz irikteý ótkennen keıin árbir suhbatty qarap shyǵamyz. Meniń tájirıbemde mundaı ádiletsiz jaǵdaılar bolǵan joq, — dep tolyqtyrdy ortalyq tóraǵasy. 

Á. Qusmanov baıqaýdyń ádil ótpeıtini týraly pikirlerge túsinikteme berdi jáne irikteý protsedýrasy úsh kezeńnen turatynyn jáne árbir kezeńde baqylaý elementteri bar ekenin aıtty.

— Biz ortalyq retinde, táýelsiz saraptamalyq komıssııaǵa yqpal etpeımiz, tek onyń quramyn mınıstrlikpen birge jasaqtaımyz. Bıyl Prezıdenttik kadr rezerviniń múshelerin, 20–30-ǵa jýyq adamdy, Ulttyq ǵylym akademııasy men basqa da bedeldi uıymdardyń ókilderin tarttyq, — dep túsindirdi spıker.

Onyń aıtýynsha, barlyq tizim ashyq jarııalanady. Іrikteýden ótpegen úmitkerlerge nátıje týraly habarlama jiberiledi, al tolyqqandy keri baılanys suranys boıynsha usynylady.

— Bizge shamamen 2–3 myńnan astam adam saýal kelip túsedi. Ókinishke qaraı, barlyǵyna egjeı-tegjeıli túsindirý múmkin emes. Birinshi týrda úmitkerdiń qansha ball jınaǵanyn aıtamyz, ekinshi týrda da solaı. Ár adam boıynsha tolyq taldaý jasamaımyz. Biraq bul jaqsy jańashyldyq bolar edi. Biz bul usynysty qarastyramyz, — dedi Ádil Qusmanov.

Sondaı-aq, ortalyq komandasy keri baılanys sapasyn arttyrý baǵytynda jumys isteıtinin atap ótti.

— Anyǵynda biz barynsha ashyq keri baılanys berýimiz kerek. Sol úshin osy baǵytta jumys isteıtin bolamyz, — dep túıindedi Á. Qusmanov.

Buǵan deıin Ádil Qusmanov «Bolashaq» stıpendııasynyń tıimdiligi zerttelip jatqanyn málimdegen edi.

Sondaı-aq, Prezıdent synynan keıin «Bolashaq» taǵylymdamasyna jas shekteýleri engizildi.