Bolashaq iri sharýashylyqtardyń qolynda - Saparbaev

AQTÓBE. QazAqparat - Aqtóbe oblysynda aýyl sharýashylyq ónimin óndirý kólemi artty. Atap aıtqanda, tamaq ónerkásibiniń kólemi 39,4 mlrd teńgege ósken, dep habarlaıdy QazAqparat tilshisi.

Bul týraly aımaq basshysy Berdibek Saparbaevtyń tóraǵalyǵymen oblys ákimdiginde ótken keńeste talqylandy. Keńeste oblys turǵyndaryna sapaly jáne farmatsevtıkalyq qyzmetter kórsetý, dári-dármekter baǵasyna monıtorıng júrgizý máseleleri qaraldy.

«Elbasy aldymyzǵa óńirdiń azyq-túlik qaýipsizdigin qamtamasyz etý, syrttan keletin tamaqtar sanyn shekteý tapsyrmasyn qoıdy. Óńdeý kásiporny jumysqa tolyq kólemde tartylýy tıis. Bul úshin óndiristik aýyl sharýashylyq kooperatıvterin qalyptastyrý jáne qoldaý jumystaryn jalǵastyrǵan jón. Bolashaq iri sharýashylyqtardyń qolynda», - dedi Berdibek Saparbaev.

Aıta ketý kerek, Aqtóbe oblysynda kúnbaǵys maıyn shyǵarý 48%-ǵa ósti. 2015-2016 jyldary «Aqtóbe et klasteri» JShS men «Aıbek» JShS jańa nysandaryn iske qosýdyń arqasynda óńirdegi et óndirý kásiporyndarynyń qýaty 12,2 myń tonnaǵa artty. Qazir aýdandarda 10 et óńdeý, 5 sút óńdeý tsehtary jumys istep tur.  Іri sút óńdeý kásiporyndarynyń óndiristik qýaty 44,2%, et óńdeý kásiporyndarynyń óndiristik qýaty 71,3%  artty.

Ótken jyly 72 aýyl sharýashylyq kooperatıvi qurylsa, olardyń 39-y et óndirýge mamandandyrylǵan, taǵy 13-i sút óndirýmen, 14-i bir ýaqytta mal jáne egin sharýashylyqtarymen, 4 kooperatıv dástúrli emes aýyl sharýashylyq túrimen aınalysady.

Zada Zeıin