«Bolashaq» baǵdarlamasynyń 2 myńnan astam túlegi ónerkásiptik jáne agrarlyq sektorda qyzmet etýde

ASTANA. QazAqparat - «Bolashaq» baǵdarlamasy aıasynda 85 PhD doktory daıarlandy. Bul týraly búgin Astanada «Bolashaq» baǵdarlamasynyń (BARCEF-2015) jyl saıynǵy halyqaralyq konferentsııasynda QR Memlekettik hatshysy Gúlshara Ábdiqalyqova málim etti.

Álemdik órkenıette óziniń mártebeli ornyn belgilegen Qazaqstan úshin bilim men ǵylymnyń máni jáne mańyzy aıryqsha ekenine toqtalǵan G. Ábdiqalyqova, «Elbasy belgilep bergen «Qazaqstan 2050» Strategııasynda básekege qabiletti damyǵan memleket bolý úshin biz saýattylyǵy joǵary elge aınalýymyz kerektigi naqty kórsetildi. Sondyqtan aldaǵy ýaqytta otandyq ekonomıkanyń odan ary órkendeýinde jáne elimizdiń álemdegi eń ozyq 30 eliniń qataryna kirýde álemdik talaptarǵa saı keletin bilimdi de, bilikti mamandardy daıarlaý mindeti tur», - dedi.

Memlekettik hatshy «Bolashaq» baǵdarlamasyn júzege asyrý jyldarynda bedeldi stıpendııanyń ıegeri retinde Qazaqstannyń 11 myńnan astam azamaty tanylǵanyn aıta kele, «Ulttyq ekonomıkamyzdyń túrli salalary úshin 8 myńnan astam joǵary bilikti mamandar daıarlandy. Búginde olardyń eki myńnan astamy ónerkásiptik jáne agrarlyq sektorda, taǵy eki myńǵa jýyǵy bilim salasynda, 1,5 myńǵa tarta maman aqparattyq tehnologııalar men kommýnıkatsııalar, 600-i medıtsına baǵyttarynda, sondaı-aq 400-den astam memlekettik qyzmette, 85 PhD doktory jáne 2,5 myńǵa jýyǵy áleýmettik-gýmanıtarlyq saladaǵy mamandar retinde qyzmet etýde. Barlyq túlekterdiń tórtten bir bóligine jýyǵy basshylyq laýazymdarda eńbek etýde», - dedi.