«Bolashaq» baǵdarlamasy aıasynda orman salasy mamandyqtaryn oqytý qajet - depýtat
ASTANA. KAZINFORM — ShQO-da bir ormanshynyń qamtıtyn aýmaǵy 3 myń gektarǵa sozylyp jatyr. Bul týraly Parlament Májilisinde ormandy qorǵaý taqyrybyna arnalǵan Úkimet saǵatynda depýtat Edil Jańbyrshın aıtty.
«Keıingi eki jyldaǵy eki iri órtten kelgen zalaldyń somasy 182 mıllıard teńgeni quraǵan jáne 100 myń gektardan astam orman joıyldy. Ormandy qalpyna keltirýge kemi shamamen 20-30 jyldaı ýaqyt ketedi. Al, osy is-sharalarǵa irilendirilgen esepteýler boıynsha 150,9 mıllıard teńge qajet bolady. ıAǵnı jalpy shyǵyn shamamen 384 mıllıard teńgeni qurap otyr.
Al, azamattyq qorǵaý salasyndaǵy birinshi kezektegi sharalardyń 2023-2027 jyldarǵa arnalǵan keshendi josparyna sáıkes, respýblıkanyń barlyq orman sharýashylyqtaryn materıaldyq-tehnıkalyq jaǵynan qamtamasyz etý úshin 68 mıllıard teńge qajet eken. «Sarań eki ret tóleıdi» degen sóz bar. Jalpy shyǵyn qajet somadan bes jarym ese asyp tur. Úkimet kerek somany tez arada sheship, búkil materıaldyq-tehnıkalyq bazany jańalap alǵany tıimdi emes pe? Bul memleket úshin de, tabıǵat úshin de paıdaly bolamaq», - dedi E. Jańbyrshın.
Onyń aıtýynsha, orman zańnamasynyń saqtalýyna memlekettik baqylaýdy júzege asyratyn Orman sharýashylyǵy komıtetiniń jumysy da kóńilden shyqpaı otyr. Keıingi 2 jylda tabıǵatty qorǵaý mekemeleriniń obektilerinde 80-nen astam tekserý josparlanǵanymen, tek 1 ǵana tekserý júrgizilgen.
«Basqasha aıtqanda, Komıtet respýblıka óńirlerindegi naqty ahýaldan jáne naqty máselelerden habarsyz deýge bolady. Bul keshendi tekserý josparlaryn jasaý kezinde Komıtet basshylyǵynyń ózekti ári mańyzdy máselelerdi eskermeıtinin jáne osy salada qalyptasqan jaǵdaıdan beıhabar ekenin kórsetip otyr», - dedi depýtat.
Sonymen qatar ol orman mekemelerinde kadrlardyń tapshylyǵy máselesine toqtaldy. Máselen, Shyǵys Qazaqstan oblysynyń 13 orman sharýashylyǵynda 747 ormanshy qyzmet atqaryp keledi, bul normatıvtiń 70%. Bir ormanshynyń qamtıtyn aýmaǵy 3 myń gektardaı.
«Júkteme úlken. Budan basqa, jalaqy men áleýmettik qoldaý máselesi, orman mekemeleriniń qyzmetkerlerin orman órtterin sóndirý taktıkasy men tásilderine oqytý, sondaı-aq qaýipsizdik tehnıkasyn saqtaý boıynsha sapaly daıarlaý júıesiniń bolmaýy ózekti máselelerdiń biri sanalady. Joǵary oqý oryndarynda «orman isi» mamandyǵy boıynsha granttar sanyn arttyrý jáne Tótenshe jaǵdaılar mınıstrligi oqý ortalyqtarynyń bazasynda orman órtterin sóndirý stantsııalarynyń qyzmetkerlerin oqytý men úıretýdi qolǵa alý qajet. Orman órtterin bolǵyzbaý jáne oǵan qarsy kúrestiń zamanaýı ári tıimdi sharalary qoldanylatyn eldermen yntymaqtastyq ornata otyryp, olardyń tájirıbesin zerdeleý jáne qoldaný qajet. Bul – Túrkııa, Ońtústik Koreıa, Kanada, Baltyq elderi jáne basqalar. Sondaı-aq, «Bolashaq» baǵdarlamasy aıasynda orman salasy mamandyqtary boıynsha joǵaryda atalǵan elderge jastarmyzdy oqýǵa jiberý qajet. Bizdegi aqparatqa sáıkes «Bolashaq» baǵdarlamasy aıasynda birde bir orman sharýashylyǵy mamany daıarlanbaǵan», - dedi Edil Jańbyrshın.
