Bokstan Qazaqstan chempıonaty: tórtinshi kúnniń nátıjesi qandaı

ASTANA. KAZINFORM - Semeı qalasynda bokstan Qazaqstan chempıonatynda 1/8 jáne 1/4 fınaldyq jekpe-jekter ótti.

Áıelder arasynda 1/4 fınalda tájirıbeli bylǵary qolǵap sheberleri súringen joq. Olar qarsylasyn jeńip, jarysty jalǵastyrýǵa múmkindik aldy.

Qos dúrkin Azııa chempıony Jaına Shekerbekova (54 keli) Sánııa Sultanqyzyn 4:1 esebimen jeńse, ulttyq quramanyń taǵy bir kóshbasshysy Karına Ibragımova (57 keli) Aıshagúl Elýbaevany 5:0 esebimen súrindirdi.

Al Aıdana Zabynbekova (57 keli) dál osyndaı eseppen Laýra Nyshanbaıdy tize búktirse, Azııa chempıony Rımma Volosenko (60 keli) ekinshi raýndta qarsylasyn nokaýtqa jiberip, tóreshiler sheshimimen jekpe-jek toqtatyldy.

Sondaı-aq álem chempıony Valentına Halzova (75 keli) Renata Grıgorevany birinshi raýndtan keıin qapy qaldyrdy. Onyń qrasylasy jekpe-jekti jalǵastyrýdan bas tartty.

Al erler arasyndaǵy 1/8 fınalda 2020 jylǵy Olımpıadaǵa qatysýshy Ábilhan Amanqul (85 keli) Serjan Erkindi, 2024 jylǵy Qazaqstan chempıony Ertýǵan Zeınýllınov (65 keli) Baǵlan Tursynbaıdy, 2017 jylǵy jastar arasyndaǵy Azııa chempıony Sanatáli Tóltaev (65 keli) Asylhan Kósherbaıdy 5:0 esebimen aıqyn basymdyqpen jeńdi.

Al 22 jasqa deıingi jastar quramasynyń kóshbasshysy Ilıa Kalının (65 keli) tóreshiler sheshimimen Ermek Erasyldy 3:2 esebimen tize búktirse, ulttyq quramanyń taǵy bir ókili Sabyrjan Aqqalyqov (75 keli) Nýrbol Muhametálıge 5:0 esebimen eshqandaı múmkindik qaldyrǵan joq.

Sondaı-aq jastar arasynda 2025 jylǵy Azııa chempıony Aman Qonysbekov (75 keli) Damır Sıneevten 5:0 esebimen basym tústi.

Aıta keteıik, chempıonat qorytyndysy boıynsha 2026 jylǵa arnalǵan ulttyq qurama jasaqtalady. Bıyl birinshilikke elimizdiń 20 óńirinen 371 sportshy qatysyp jatyr.