Bokstan Álem kýbogyna qandaı tanymal sportshylar qatysady

ASTANA. KAZINFORM - Astanada ótetin bokstan Álem kýbogyna qandaı tanymal sportshylardyń qatysatyny belgili boldy.

Dúbirli doda 30 maýsym-6 shilde aralyǵynda elordadaǵy Jaqsylyq Úshkempirov atyndaǵy jekpe-jek saraıynda ótedi. Onda erler jáne áıelder quramalary júldelerdi sarapqa salady.

Álem kýbogyna 30 elden 300-ge jýyq boksshy qatysady. Bul - Olımpıadalyq WORLD BOXING uıymynyń Qazaqstandaǵy alǵashqy jarysy bolyp otyr. Álem kýbogy jyl boıyna birneshe kezeńmen ótkiziledi. Reıtıngilik saıysta ár salmaq dárejesinde jeńimpazǵa 300, ekinshi orynǵa 200, qos qola júldegerge 150 upaıdan beriledi.

Onda Olımpıada jáne álem chempıonattarynda top jarǵan tanymal sportshylar da baq synaıdy. Olardyń qatarynda 2023 jylǵy álem chempıonatynyń qola júldegeri Vasılı Lkadırı (Frantsııa), 2021 jylǵy álem chempıony Robbı Gonsales (AQSh), 2024 jylǵy Olımpıada Oıyndarynyń kúmis júldegeri Bıllıal Bennama (Frantsııa), eki dúrkin Eýropa chempıony, álem chempıonatynyń qola júldegeri Nıdjat Gýseınov (Ázerbaıjan) jáne taǵy basqalar bar.

Ashylý saltanaty 30 maýsymda saǵat 13:00-de dep belgilengen.

Eske salsaq, bokstan Qazaqstan quramasy sheshýshi oqý-jattyǵý jıynyn ótkizip jatyr.