Bokstan álem chempıonatynyń jerebesi qashan tartylady

ASTANA. KAZINFORM — Bokstan World Boxing aıasynda ótetin álem chempıonatynyń jerebe tartý rásimi qashan ótetini belgili boldy. 

Qazaqstan boks federatsııasynyń málimetinshe, saltanatty rásim Qazaqstan ýaqytymen 23:00–ge belgilengen.

Dúbirli doda 4-14 qyrkúıek aralyǵynda Anglııanyń Lıverpýl qalasynda ótkiziledi. Jekpe-jekter «Qazaqstan» jáne «Qazsport» telearnalarynan tikeleı efırde kórsetiledi.

Álemniń ár qıyrynan kelgen boksshylar 4-10 qyrkúıek aralyǵynda irikteý kezeńinde saıysqa túsedi. Al 12-13 qyrkúıekte jartylaı bolsa, 13-14 qyrkúıekte fınaldyq básekeler ótedi.

Elimizdiń erler quramasynyń bas bapkeri Qaırat Sátjanov negizinen tájirıbeli boksshylarǵa senim artyp otyr. Olardyń qatarynda Sanjar Táshkenbaı (50 keli), Mahmud Sabyrhan (55 keli), Beıbarys Jeksen (60 keli), Ertýǵan Zeınýlınov (65 keli), Tórehan Sabyrhan (70 keli), Sabyrjan Aqqalyqov (75 keli), Nurbek Oralbaı (80 keli), Bekzat Nurdáýletov (85 keli), Saǵyndyq Toǵambaı (90 keli) men Aıbek Oralbaı (90 keliden joǵary) bar.

Al Eldos Saıdalın bastaǵan bapkerler áıelder quramasynda tómendegi bylǵary qolǵap sheberlerine senim artty.

Aldaǵy álem chempıonatynda elimizdiń atynan Nazym Qyzaıbaı (48 keli), Alýa Balqybekova (51 keli), Elına Bazarova (54 keli), Karına Ibragımova (57 keli), Vıktorııa Grafeeva (60 keli), Aıda Ábikeeva (65 keli), Natalıa Bogdanova (70 keli), Nadejda Rıabets (75 keli), Gúlsaıa Erjan (80 keli) jáne Eldana Talıpova (80 keliden joǵary) synǵa túsedi.