Boksshy Meıirim Nursultanov qarsylasyn nokaýtpen utyp, chempıondyq belbeýin saqtap qaldy

ASTANA. QazAqparat – Ońtústik Koreıanyń Inchhon qalasynda ótken boks keshindegi basty jekpe-jekte qazaqstandyq Meıirim Nursultanov (18-0, 10 KO) pen japonııalyq Kadzýto Takesako (15-0, 14 KO) sharshy alańǵa shyqty, dep habarlaıdy QazAqparat tilshisi.

M. Nursultanov bul jekpe-jekte orta salmaqtaǵy WBO International tujyrymy boıynsha chempıondyq ataqty sarapqa saldy.

Boksshylardyń ekeýi de buǵan deıin rıngte jeńilip kórmegen edi. Meıirim jekpe-jek barysynda basymdylyǵyn baıqatyp, segizinshi raýndta qarsylasyn sulatyp túsirdi.

Osylaısha, 12 raýndqa eseptelgen jekpe-jek merziminen buryn aıaqtalyp, Kadzýto Takesako alǵash ret nokaýtpen jeńildi.

Sóıtip, M. Nursultanov kásipqoı bokstaǵy 19-shy jeńisine qol jetkizip, WBO beldigin saqtap qaldy.

Eske sala keteıik, budan buryn Meıirim Nursultanovtyń WBO tıtýly úshin jekpe-jek aldynda salmaq ólsheý rásiminen ótkenin jazǵan edik.