Boksshylar baryn saldy, biz óz mindetimizdi ótedik – Myrzaǵalı Aıtjanov

PARIJ. KAZINFORM – Búgin bokstan Qazaqstan ulttyq quramasynyń bas bapkeri Sáken Bıbosynovtyń jeńilisinen keıin Parıj olımpıadasy qazaq boksshylary úshin eń sátsiz ótip jatqan oıyndar ekenin aıtyp berdi.

«Olımpıadany ózderiń kórip jatsyńdar. Bizdiń jigitter qolynan kelgenniń barlyǵyn jasady. Biz de boksshylarymyzdy joǵary deńgeıde daıyndap alyp keldik. Barlyǵy aıanyp qalyp jatqan joq. Biraq, sharshy alańda tóreshi kimniń qolyn kóterdi. Sol jeńimpaz dep sanalady. Óz basym eshkimdi kinálamaımyn. Bárin halyq kórip otyrǵan shyǵar», - dedi bas bapker.

Sondaı-aq, ol Parıj olımpıadasy qazaq boksshylary úshin eń sátsiz, nashar ótken oıyndar ekenin jasyrmady.

«Parıj bizge qutty Olımpıada bolǵan joq. Tokıoda eki qola medalǵa shýlap edi. Parıjde bir ǵana medal bolaıyn dep tur. Múmkin qatelikter bolǵan shyǵar. Qatelik árbir adamda bolady. Chempıon bolǵanda da bolady. Parıj olımpıadasy biz úshin óte sátsiz boldy. Endi sheshimdi basshylar qabyldaıdy, biz óz jumysymyzdy atqardyq, boksshylardy daıyndap ákeldik. Boksshylar baryn saldy, jeńis berdi-bermedi, ony bapkerler sheshpeımiz.», - dedi bas bapker.

Esterińizge sala ketsek, bokstan Qazaqstan erler quramasy Olımpıada oıyndaryna tolyq qurammen (7 boksshy) kelgen bolatyn. Alaıda, olardyń altaýy jartylaı fınalǵa jete almady. Qazir tek, jartylaı fınalda judyryqtasatyn jalǵyz boksshymyz qaldy. Ol - Nurbek Oralbaı. Sonymen qatar áıelder arasynda Nazym Qyzaıbaı bar. Ol endi shırek fınalda synǵa túsedi.