Blue Origin kompanııasy arbada otyrǵan adamdy ǵaryshqa ushyrdy
ASTANA. KAZINFORM — Senbi kúni sal aýrýyna shaldyqqan nemis ınjeneri men taǵy 5 jolaýshy Blue Origin zymyranymen 10 mınýttyq saparǵa shyǵyp, Jerden 65 mıl bıiktikke jetti, dep habarlaıdy VVS.
— Bul eń keremet tájirıbe boldy, — dedi Mıhaela Benthaýs Jerge qonǵannan keıin.
Ol 7 jyl buryn taýda velosıpedpen kele jatyp, omyrtqasyn jaraqattap alǵan. Biraq bul onyń ǵaryshqa ushý týraly armanyna jetýge kedergi bolmady.
— Maǵan tek kórinis pen mıkrogravıtatsııa ǵana emes, sonymen birge kóterilýdiń ózi de unady. Bul joldyń ár qadamy keremet keremet boldy, — dedi ol.
Mıhaela Benthaýs Eýropalyq ǵarysh agenttiginde aeroǵarysh jáne mehatrondyq júıeler ınjeneri bolyp jumys isteıdi. Ol apattan keıin múgedekter úshin álemniń qanshalyqty qoljetimsiz ekenin túsingenin aıtady.
— Meniń ǵaryshqa ushýym múmkin emes dep oıladym. Óıtkeni densaýlyǵy myqty adamdar arasynda básekelestik óte joǵary, — dedi ol.
Ǵaryshker bolý armanyn júzege asyrý úshin Benthaýs burynǵy SpaceX-tiń ǵarysh ınjeneri Hans Kenıgsmannǵa júgingen.
— Men Hanspen alǵash ret jelide tanystym. Odan jaı ǵana «Siz SpaceX-te uzaq ýaqyttan beri júrsiz, men sııaqty adamdar astronavt bola ala ma?» dep suradym, — dedi Benthaýs.
Kenıgsmann jaýap berip qana qoımaı, Djeff Bezos negizin qalaǵan ǵaryshtyq týrıstik kompanııa Blue Origin-pen 10 mınýttyq tarıhı ushýdy uıymdastyrǵan. Sondaı-aq kompanııa ishinara qarjylandyrdy.
Hans ushý kezinde qajet bolǵan jaǵdaıda kómek kórsetý úshin Benthaýstyń janynda otyrdy. Kenıgsmannyń aıtýynsha, Benthaýs ony ǵaryshqa ushýǵa shabyttandyrǵan.
— Onyń ynta-yqylasy meni de muny isteýim kerek ekenine sendirdi, — dedi ol.
Blue Origin kompanııasy kapsýlaǵa kirip-shyǵýǵa kómektesetin jerústi qoldaý jabdyǵy qosylǵanyn aıtty. Bul Benthaýstyń kapsýlaǵa ózdiginen kirýine múmkindik berdi.
Blue Origin kompanııasynyń qaıta paıdalanýǵa bolatyn sýborbıtaldy kóligi New Shepard Tehas ushyrý alańynan GMT ýaqytymen 14:15–te kóterildi. Shaǵyn, tolyq avtomattandyrylǵan zymyran tiginen ushyp, sodan keıin týrısterdi tasymaldaıtyn kapsýla bólinip, Tehas shóline qonǵan.
Blue Origin júzege asyrǵan ǵaryshtyq týrızmniń quny jarııa etilmedi. Buǵan deıin kompanııa ondaǵan týrısti ǵaryshqa ushyryp úlgerdi. Sáýir aıynda kompanııanyń zymyrany 6 áıeldi 11 mınýttyq ǵarysh saparyna jibergen bolatyn. Olardyń qatarynda pop-juldyz Ketı Perrı, Djeff Bezostyń qalyńdyǵy Loren Sanches jáne CBS telejúrgizýshisi Geıl Kıng boldy.
Aıta keteıik, Djeff Bezostyń Blue Origin kompanııasy bıyl qańtar aıynda alǵash ret jańa «Nıý Glenn» zymyranyn ushyrdy.