Bloomberg: Irak munaıyn tıegen tanker Ormýz buǵazynan ótti

ASTANA. KAZINFORM - Bloomberg jarııalaǵan keme qozǵalysyn baqylaý derekterine sáıkes, keshe Ormýz buǵazy arqyly ırak munaıyn tasymaldaǵan Ocean Thunder tankeri ótken, dep habarlaıdy Agenzianova.

Shamamen 1 mıllıon barrel munaı tasymaldaýǵa qabiletti bul keme naýryz aıynyń basynda Basra termınalynda júk tıep, Malaızııaǵa baǵyt alǵan.

Baqylaý málimetteri Ocean Thunder tankeri buǵazǵa Tegeran buryn maquldaǵan baǵyt boıynsha kirgenin kórsetedi. Sonymen qatar Bloomberg keme qozǵalysyn baqylaý derekteri árdaıym naqty bola bermeıtinin atap ótedi. Buǵan sıgnaldaǵy tehnıkalyq aqaýlar nemese qaýipti aımaqtarda navıgatsııa kezinde taratqyshtardyń ádeıi óshirilýi sebep bolýy múmkin.

4 sáýir, senbi kúni «Hatam ál-Anbııa» jedel qolbasshylyǵynyń ókili Ibrahım Zolfagarı Irakqa teńiz qozǵalysyna qatysty shekteýler qoldanylmaıtynyn málimdedi.

Onyń aıtýynsha, bul shekteýler tek «dushpan memleketterge» ǵana qatysty bolady. Atalǵan qurylym Irannyń turaqty qarýly kúshteri men Islam revolıýtsııasy saqshylar korpýsyn biriktiredi.

Túrkııa kólik mınıstri: Soǵys bastalǵaly buǵazdan úsh keme ǵana ótti

Túrkııanyń kólik jáne ınfraqurylym mınıstri Abdýlkadır Ýraloglý 28 aqpanda bastalǵan AQSh pen Izraıldiń Iranǵa qarsy soǵysynan beri Ormýz buǵazy arqyly Túrkııaǵa tıesili nebári úsh keme ótkenin málimdedi. Bul týraly Anadolu habarlady.

Onyń aıtýynsha, Túrkııaǵa tıesili munaı tasymaldaıtyn tanker Ormýz buǵazy arqyly Parsy shyǵanaǵynan aman shyqqan.

Mınıstrdiń dereginshe, qazirgi tańda Ormýz buǵazy mańynda Túrkııaǵa tıesili 12 keme bar. Túrik tarapy segiz kemeniń jáne 156 ekıpaj múshesiniń qaýipsiz qozǵǵalysyn qamtamasyz etý boıynsha jumystardy jalǵastyryp jatyr.

Osyǵan deıin Ormýz buǵazy arqyly keme qatynasy 90% qysqarǵany týraly jazdyq.