Bilim berý jáne densaýlyq saqtaý uıymdarynda tamaqtanýdyń standarttary ózgertildi

ASTANA. KAZINFORM — Densaýlyq saqtaý mınıstri 2025 jylǵy 4 naýryzdaǵy buıryǵymen densaýlyq saqtaý jáne bilim berý uıymdarynda tamaqtaný standarttarynyń jańa erejesin bekitti.

Standart densaýlyq saqtaý jáne bilim berý uıymdarynda tamaqtanýdy uıymdastyrýdyń jalpy talaptaryn belgileıdi.

Densaýlyq saqtaý uıymdarynda tamaqtaný qalaı uıymdastyrylýy kerek.

Árbir densaýlyq saqtaý uıymynda negizgi, turaqty qoldanylatyn dıeta belgilenedi jáne qajet bolǵan jaǵdaıda basqa dıeta qoldanylady. Sonymen qatar, arnaıy kórsetkishterge baılanysty dıetaǵa belgili bir túzetýler engizilýi múmkin. Dıetadaǵy qosymsha ózgerister nemese shekteýler belgili bir emdik qasıetteri bar ónimderdi (súzbe, baýyr, sút, qarbyz, alma, sarymsaq) engizý nemese shekteý, sondaı-aq belgili bir taǵamdyq ónimniń (aqýyz, maı, kómirsý, tuz, dárýmen) mólsherin kóbeıtý nemese azaıtý arqyly júzege asyrylady.

Naýqas densaýlyq saqtaý uıymyna túsken kezde emdik tamaqtaný kezekshi dárigerdiń taǵaıyndaýymen belgilenedi. Taǵaıyndalǵan dıeta aýrý tarıhyna engiziledi jáne barlyq túsken naýqasqa arnalǵan jıyntyq tapsyrysqa jazylyp, belgilengen ýaqytta ashanaǵa jiberiledi.

Densaýlyq saqtaý uıymdarynyń ashanasynda qatań saqtalýy tıis:
— qoǵamdyq tamaqtaný jáne densaýlyq saqtaý obektilerine arnalǵan qoldanystaǵy sanıtarlyq erejelerde kózdelgen ashanany jabdyqtaý, sanıtarııalyq jaǵdaıdy saqtaý jáne taǵam daıyndaý tehnologııasy boıynsha talaptar;
— tamaq ónimderin saqtaý sharttary men merzimderi boıynsha talaptar;
— as blogy, tamaq taratý bólimderi men býfet qyzmetkerleriniń mindetti profılaktıkalyq jáne medıtsınalyq tekserýlerden ótý talaptary.
Bilim berý uıymdarynda tamaqtaný qalaı uıymdastyrlýy kerek
— Bilim berý uıymynyń beıinine, bilim alýshylardyń bolý ýaqytyna, jas erekshelikterine sáıkes tamaqtaný tásilin, formasyn, modelin, rejımin (jıiligin) jáne uıymdastyrý kestesin aıqyndaý;
— Tamaqtanýdy uıymdastyrýǵa qatysatyn barlyq taraptyń, sonyń ishinde bilim berý salasyndaǵy basqarý organdarynyń, bilim berý uıymdarynyń ákimshiliginiń, tamaqtaný qyzmetin jetkizýshilerdiń ózara árekettestigin qamtamasyz etý;
— Bilim berý uıymdarynda tamaqtanýdy uıymdastyrýǵa jaýapty tulǵalardy anyqtaý;
— Tórt aptalyq maýsymdyq perspektıvalyq mázirdi, kúndelikti taǵam úlesin esepteıtin mázir jáne kúndelikti mázirdi ázirleý;
— Bıýdjet qarajaty, jeke nemese basqa jolmen tartylǵan qarajat esebinen ystyq tamaqpen qamtamasyz etiletin bilim alýshylardyń onyń ishinde arnaıy dıetalyq qajettiligi bar balalardyń esebin júrgizý;
— Ashana jabdyǵy men quraldaryn jumys jaǵdaıynda ustaý, olardy turaqty jańartý, jetkilikti mólsherde ydys-aıaq, jıhaz, úzdiksiz energııa men sýmen jabdyqtaý, sonymen qatar sý burý, jeldetý jáne aýa baptaý júıeleriniń turaqty jumysyn qamtamasyz etý;
— Tamaqtanýdy uıymdastyrý boıynsha esepke alý jáne esep qujattamasyn júrgizý;
— Azyq-túlik ónimderi men daıyn taǵamdardyń sapasy men qaýipsizdigine, tamaqtanýdy uıymdastyrýǵa, Qazaqstan Respýblıkasynyń tamaq ónimderiniń qaýipsizdigi jáne sanıtarlyq-epıdemıologııalyq salasyndaǵy zańnamasyn saqtaýǵa óndiristik baqylaýdy júzege asyrý.

Densaýlyq saqtaý jáne bilim berý uıymdarynda tamaqtaný standarttarymen tolyǵyraq siltemege ótip tanysýǵa bolady. 

Aıta ketsek, jyl basynda mamandar oqýshylardyń durys tamaqtanýynyń perspektıvalyq mázirin ázirledi.