BQO joldaryn kútip ustaýda 60-tan astam aqaýlyq anyqtaldy
ORAL. KAZINFORM – Batys Qazaqstan oblysynda qysqy mezgilde joldy kútip ustaýda merdiger uıymdar tarapynan kóptegen zańbuzýshylyqqa jol berilgeni belgili boldy.
«Jol aktıvteriniń ulttyq sapa ortalyǵy» RMK BQO fılıalynyń bólim basshysy Dáýren Ámirovtiń málim etkenindeı, respýblıkalyq joldardyń jaı-kúıine júıeli túrde monıtorıng júrgizilip keledi.
Onyń sózine qaraǵanda, osy oraıda jol qozǵalysy qaýipsizdigin qamtamasyz etýge, jol júrý bóligin qar men muzdan tazartýǵa, kóktaıǵaqqa qarsy materıaldarmen óńdeýge aıryqsha kóńil bólinedi. Sonymen qatar jol jıegi, aıaldamalar men jaıaý júrginshi aýmaqtary da umyt qalmaıdy.
- Jyl basynan beri avtomobıl joldary ýchaskelerine mamandar 30 ret shyǵyp, tekserý júrgizdi. Sonyń barysynda 19 synama alynyp, 64 aqaýlyq anyqtaldy. Munyń 17-si joıyldy. Zańbuzýshylyqqa jıi jol bergen merdigerlerge qatysty aıyppuldy qosqanda, ákimshilik yqpal etý sharalary qoldanylady, - dedi D.Ámirov.
Mamannyń aıtýynsha, der kezinde jol tazartylmasa, ol jol-kólik oqıǵalarynyń týyndaý qaýpin kúsheıtedi. Eń bastysy, adamdardyń ómiri men densaýlyǵyna qaýip tóndiredi. Avtomobıl joldaryn kútip ustaý kezinde kún raıynyń ózgerýine oraı jedel qımyldap, sonymen qatar tehnologııalyq talaptardy qatań saqtaý talap etiledi.
Eske sala keteıik, budan buryn mamannyń kúre jolda tapsyrys berýshi tarapynan baqylaý bolmaıynsha kemshilikter joıylmaıtyny jóninde aıtqanyn jazǵan edik.