BQO volonterleri kimderge jáne qalaı kómek kórsetýde: Aıbolat Qurymbaevpen suhbat
- Aıbolat, eriktilik qyzmetti qashan bastadyń?
- Keıingi ómir jolymdy paraqtap otyrsam, eriktilik qyzmetti mekteptegi kezimnen bastaǵan ekenmin. 1992 jyly qarııalarǵa kómekteskenim úshin sol kezdegi Qyzyl krest jáne Qyzyl jarty aı qoǵamy oblystyq fılıalynyń marapatyna ıe bolyppyn. Jalpy, ata-analarymyz bala jasymyzdan úlkenge qurmet kórsetip, kishige qamqor bolýǵa, kómekke muqtaj adamdarǵa qolushyn sozýǵa úıretti ǵoı. Mektepte de solaı tárbıeledi. Instıtýt bitirgennen keıin «Naryn jastary» jastar qoǵamdyq birlestiginde qyzmet atqaryp, soǵys jáne tyl ardagerlerine járdem berdik. Otynyn jaryp, kómirin tasyp, malyna qarasyp degendeı qyzmet atqardyq.
- Qaıyrymdylyq – qazaqqa tán qasıettiń biri. Osy jóninde ne aıtar ediń?
- Iá, oǵan sóz bar ma! Qazaqtyń qanyna bitken qasıet qoı bul. Múmkindigi bar adamdar áýelden aınalasyndaǵy adamdarǵa maldaı, aqshalaı járdemdesken ǵoı. Múmkindigi joqtar da qalys qalmaǵan, olar qyzmetimen, is-qımylymen úlgi bolyp júrgen. «Asar», «úme» degen túsinik bar, ol tekten-tek shyqpaǵan, muqtaj jandarǵa kóptep-kólemdep kómek berip, tipti úı, qora-qopsy salýǵa deıin qyzmetin atqaryp, qatarǵa qosyp jibergen halqymyz. Sondyqtan eriktilik qazaqqa tańsyq nárse emes. El tarıhynda, qoǵamda ejelden qalyptasqan salt-dástúrimizdiń bir úzigi deýge bolady.
- Eriktiler qyzmeti indet kezinde óris aldy ǵoı. Qandaı jumystar atqaryldy?
- Іndetpen kúres sharalary bastalǵannan beri eriktilerdiń aldyńǵy shepte júrgeni belgili. Oral qalasy jıyrma aýmaqqa bólinip, bizge 11-inshi aýmaq tıdi. Temirjol vokzaly, saıajaılar, úsh mektep baqylaýymyzda boldy. Tıisti mekemelerge, áleýmettik qyzmetkerlerge habarlasyp, az qamtylǵan, kópbalaly otbasylar, jalǵyzilikti jandar, soǵys, tyl jáne eńbek ardagerleriniń tizimin aldyq. Sol boıynsha muqtajdarǵa kómegimizdi aıaǵan joqpyz. Bul jerde olarǵa tek azyq-túlik aparý ǵana emes, sondaı-aq elektrondy kilt alý, kólikpen jetkizý, taǵy basqa jumystardy atqardyq. Mysaly, tyl ardageriniń eki aıaǵy joq, ózi jalǵyz turady. Soǵan kóktemnen beri úıin jınap berip, sýǵa túsýine járdemdesip kelemiz.
- Osy kezeńde erekshe este qalarlyqtaı oqıǵalar boldy ma?
- Árıne, túrli oqıǵalar bolyp jatyr ǵoı. Sonyń bireýine toqtalaıyn. Іndet kezinde bir áıel adam habarlasyp, óziniń Aqtóbe qalasynan kelip, blokposttardyń ornatylýyna baılanysty qaıta almaı otyrǵanyn, ózi jalǵyyzbasty ekendigin, úıinde úsh balasynyń qaraýsyz qalǵanyn aıtty. Biz sol boıda Aqtóbedegi áriptesterimizge habarlasyp, olar áıel úıine barǵansha, balalaryna as-sýyn berip, qamqorlyq jasady. Mundaı jaǵdaılar bolyp jatyr ǵoı.
Jalpy, ózim eriktilik qyzmettiń aýqymy keń dep oılaımyn. Qaıyrymdylyq qana emes, ózimniń negizgi qyzmetim – tarıhı-mádenı murany saqtaý da soǵan kiredi. Qorǵaýdy qajet etetin tarıhı, tabıǵı muralar Batys Qazaqstan oblysynda da jetkilikti. Olardy esepke alyp, zerttep, qorǵamasaq, erteń joıylyp ketýi múmkin. Sondyqtan osyndaı jerlerge ǵylymı ekspedıtsııalar uıymdastyryp, óz ólkemizdiń baı murasyn saqtaýǵa barynsha úlesimizdi qosyp kelemiz. Ózimiz dúnıege kelgen Bókeı ordasy aýdanynyń da tarıhy baı. Aldaǵy jyly Bókeı handyǵynyń qurylǵanyna 220 jyl, Jáńgir han mektebiniń ashylǵanyna 180 jyl tolady. Tuńǵyshtar mekeni sanalatyn Han ordasyna elimiz turǵyndary ǵana emes, sheteldikter de bet buryp, ótkenimizdi bilip, qurmettep jatsa, bárimizge de ǵanıbet qoı.
- Aıbolat, ózińdi Aq Jaıyq jurtshylyǵy el men jer tarıhyna túren salyp júrgen ólketanýshy retinde jaqsy biledi. Reseı ólketanýshylar odaǵynyń, Qazaq ulttyq geografııa qoǵamynyń múshesisiń. Jýyrda 1845 jyly qurylǵan Orys geografııa qoǵamynyń músheligine de óttiń. Kezinde qazaqtyń tuńǵysh ǵalymdary Shoqan Ýálıhanov, Muhamed-Salyq Babajanov múshe bolyp saılanǵan mártebeli uıym ǵoı. Sondyqtan aldaǵy ýaqytta da elge jasap jatqan qyzmetińniń tabysty bolýyna tilektespiz.
- Rahmet, biz qaı qyzmetimizdi de el úshin dep atqaramyz. Eń bastysy, elimiz aman, jurtymyz tynysh bolsyn. Koronavırýs indetiniń tezirek beti qaıtyp, jarqyn kúnderde júzdesýge jazsyn degim keledi.
