BQO turǵyndary ádemi nómir alýǵa 142 mln teńge jumsaǵan
«Azamattarǵa arnalǵan úkimet» memlekettik korporatsııasy KEAQ BQO boıynsha fılıalynyń dırektory Nádir Qurymbaevtyń óńirlik kommýnıkatsııalar qyzmeti alańynda málim etkenindeı, kólikti satyp alý jáne resimdeý kezinde árbir azamat memlekettik nómir alýǵa mindetti.
Klıent mamandandyrylǵan bólimde usynylǵan nómirlerden tańdaý jasaý kezinde «joǵary suranysqa ıe» nómirler qataryndaǵy sandar nemese áripterdi qoldana otyryp, óz qalaýyndaǵy nómirge ákimshilik polıtsııa basqarmasyna jolyǵý arqyly tapsyrys bere alady.
–Kerekti nómir bos bolsa, bir aıdyń ishinde mamandandyrylǵan bólimnen kelip ala alady. Kólik quralyn satqan jaǵdaıda klıenttiń VIP-nómirdi óz atyna qaldyrý quqyǵy bar. Tek mamandandyrylǵan bólimge ýaqytsha tapsyrý kerek. Qarapaıym nómirlik belginiń quny – 2,8 AEK nemese 8 576 teńge. «Joǵary suranysqa ıe» nómirler quny 174 591 teńgeden 872 955 teńgege deıin turady, – deıdi Nádir Shamuratuly.
Onyń sózine qaraǵanda, «Azamattarǵa arnalǵan úkimet» memlekettik korporatsııasy memlekettik qyzmetterdi alý úderisin jeńildetýge baǵyttalǵan jańa servısterdi turaqty túrde engizýde. Sonyń biri – QR-kodtyń kómegimen ekinshi deńgeıdegi bankterdiń mobıldi qosymshalary arqyly memlekettik baj salyǵyn tóleý. Nátıjesinde front-ofısterdiń klıentterine kassalarǵa kezekte turýdyń jáne HQO mamandaryna qaıta júginýdiń qajeti joq.
Ótken jyldan beri tabysty iske asyrylyp kele jatqan jańa servısterdiń ishinen – ekinshi deńgeıdegi bankterdiń, atap aıtqanda kaspi jáne homebank mobıldi qosymshalary arqyly avtokólikti qaıta tirkeýdi ataýǵa bolady. Buryn avtomobıldi tek mamandandyrylǵan bólimde tirkeýge bolatyn. Qazir avtokólik ıeleri avtokólikti eGov.kz portaly jáne Kaspi, homebank qosymshalary arqyly qaıta tirkeı alady. 2021 jyly atalǵan elektrondyq quraldar arqyly 20 myńǵa jýyq avtomobıl tirkeldi, bul kólikti qaıta tirkeý boıynsha kórsetilgen qyzmetterdiń jalpy sanynyń 23,5 paıyzyn quraıdy.
«2022 jyldyń qańtar aıynan bastap Oralda HQO-dan klıenttiń mekenjaıyna deıin daıyn qujattardy jetkizý qyzmeti engizildi. Oǵan 150-ge jýyq memlekettik qyzmet engizilgen. Olardyń ishinde jyljymaıtyn múlikke quqyqtardy (aýyrtpalyqtardy) memlekettik tirkeý, jer telimderine arnalǵan aktiler, bilim týraly qujattarǵa apostıl qoıý, muraǵattyq anyqtamalar, áskerı bıletterdiń telnusqalaryn berý jáne t.b. qujattar daıyn bolǵannan keıin klıentke mekenjaıyna qujattardy jetkizýdi resimdeý úshin web-betke derbes siltemesi bar SMS-habarlama kelip túsedi. Klıent ótinimdi toltyrǵannan keıin qujattardy jetkizý 1 jumys kúni ishinde júzege asyrylady. Qyzmet –aqyly, qala boıynsha jetkizý quny – 970 teńge», dedi N.Qurymbaev.
Sondaı-aq avtokóliktiń tehpasporty men memlekettik nómirin úıge jetkizý servısi de bar. Avtomobıldi onlaın qaıta tirkegennen keıin kólik quralyn tirkeý týraly kýálik alý úshin mamandandyrylǵan bólimge barýdyń qajeti joq. Qyzmetke eGov.kz portalynda tapsyrys berýge bolady. Qyzmet quny – 2240 teńge.
Fılıal dırektorynyń aıtýynsha, «Azamattarǵa arnalǵan úkimet» QR Eńbek jáne halyqty áleýmettik qorǵaý mınıstrligimen birlesip, kóp balaly otbasylarǵa arnalǵan járdemaqyny proaktıvti taǵaıyndaý qaǵıdatyn engizdi. Endi otbasynda tórtinshi jáne odan keıingi bala týǵan jaǵdaıda analarǵa týý týraly kýálikti, balanyń týylýy jáne kútimine taǵaıyndalatyn járdemaqymen qosa kóp balaly otbasylarǵa arnalǵan járdemaqyny da proaktıvti taǵaıyndaýǵa sms-habarlama jiberiledi.
Buryn osy tólemdi resimdeý úshin HQO-ǵa júginip, balalardyń týý týraly kýálikteriniń kóshirmelerin usyný qajet bolatyn. Jańashyldyq klıentterge halyqqa qyzmet kórsetý bólimderine aıaqtaı baryp, ýaqyt pen resýrstardy shyǵyndamaýǵa múmkindik beredi.
Bul járdemaqyny tórt jáne odan da kóp birge turatyn kámeletke tolmaǵan balalary nemese 23 jasqa deıingi kúndizgi bólimde oqıtyn stýdentteri bar otbasylar ala alady.
Sonymen qatar balanyń týylýyna jáne onyń bir jasqa deıingi kútimine baılanysty tólenetin járdemaqyny resimdegisi keletin azamattar turǵylyqty jerine qaramastan (eksaýmaqtyq qaǵıdat boıynsha) eldiń kez kelgen HQO-na júgine alady. Buryn osy járdemaqyny alý úshin HQO bólimderinde azamattardyń turaqty mekenjaıynyń bolýy jáne tirkelgen jeri boıynsha ǵana jolyǵýy talap etiletin.
Eksaýmaqtyq qaǵıdat azamattardyń balanyń týylýy men bir jasqa tolǵanǵa deıin onyń kútimine baılanysty tabysynan aıyrylǵan jaǵdaıda tólenetin áleýmettik tólemderdi tirkelgen mekenjaıyna qaramastan, eldiń kez kelgen HQO-nda resimdeı alady.
Sondaı-aq balanyń týylýyna jáne onyń bir jasqa deıingi kútimine baılanysty tólenetin járdemaqyny kaspi jáne homebank mobıldi qosymshalary arqyly smartfonnyń kómegimen resimdeýge bolady. Bankke barýdyń, arnaıy esepshot ashýdyń qajeti joq. «Memlekettik qyzmetter» bóliminde qajetti derekterdi kórsetip, sms kómegimen ótinim jiberse jetkilikti.
BQO boıynsha 2021 jyly balanyń týylýyna jáne onyń bir jasqa deıingi kútimine baılanysty 14 myńnan astam memlekettik qyzmet kórsetilgen. Bul kórsetkish 2020 jyldyń nátıjesimen salystyrǵanda, 9 paıyzǵa ósken.
N.Qurymbaev óz sózinde jyljymaıtyn múlikti eki saǵat ishinde tirkeýge bolatynyn jetkizdi. «Azamattarǵa arnalǵan úkimet» memlekettik korporatsııasynyń bastamasymen QR Ádilet mınıstrligi jyljymaıtyn múlikke quqyqtardy tirkeý erejelerine ózgerister engizdi. Endi notarıýsta jyljymaıtyn múlikke quqyqtardy tirkeý boıynsha jasalǵan mámileden keıin klıent qalaýy boıynsha qosymsha tólem jasap eki saǵat ishinde jedeldetilgen tártippen memlekettik qyzmetti ala alady.
Qyzmet kórsetý ýaqytyn qysqartý ákimshilik kedergiler men sybaılas jemqorlyq táýekelderin joıýǵa múmkindik beredi.
Buǵan deıin «Azamattarǵa arnalǵan úkimet» kaѕri bankimen birlesip, notarıýs arqyly jyljymaıtyn múlikti tirkeý úshin alynatyn memlekettik baj salyǵyn kaspi.kz mobıldi qosymshasy tóleý múmkindigin iske asyrǵan bolatyn. Al oǵan deıin notarıattyq mámile jasalǵannan keıin notarıýs qujattardyń elektrondyq kóshirmelerin biryńǵaı notarıattyq aqparattyq júıe arqyly tirkeýge jiberedi de, mámile protsesin tolyǵymen aıaqtaý úshin azamattar bankterdiń nemese Qazpochtanyń kassalaryn izdep, tólem túbirtegin usyný úshin notarıýsqa qaıta júginýge májbúr bolatyn. Protsess áldeqaıda jeńildetildi.
Bul baǵyttaǵy jumystar jalǵasatyn bolady.
«Jalpy, «Azamattarǵa arnalǵan úkimettiń« qyzmeti birneshe baǵyttan turady, olar: halyqqa qyzmet kórsetý bólimderi; áleýmettik qyzmet kórsetý: zeınetaqy, járdemaqy taǵaıyndaý; jer kadastry jáne jyljymaıtyn múlikti tirkeý salasyndaǵy qyzmetter. Fılıalda 658 qyzmetker bolsa, sonyń 30-y – múmkindigi shekteýli azamattar. Qazirgi ýaqytta oblys boıynsha 72 bos jumys orny bar. Barlyq qalalyq jáne aýdandyq bólimderge ár túrli laýazymdarǵa qyzmetkerler qajet. Negizinen halyqqa qyzmet kórsetý bólimderine, tirkeý jáne jer kadastry bólimderine mamandar qajet. Bos jumys oryndary týraly tolyq aqparatty memlekettik korporatsııanyń www.gov4c.kz saıtynan nemese www.enbek.kz saıtynan alýǵa bolady. 694 memlekettik qyzmettiń 665-i memlekettik korporatsııa arqyly, eGov.kz elektrondyq úkimet portaly arqyly 637 qyzmet kórsetiledi. 2021 jyly bizdiń fılıal arqyly 531 275 memlekettik qyzmet kórsetildi. Onyń ishinde asa suranysqa ıe: 126 422 elektrondyq sandyq qoltańba berildi, 77 751 jeke kýálikter men pasporttar berildi, avtomobılderdi tirkeý boıynsha 64 282 qyzmet kórsetildi, 52 285 jyljymaıtyn múlik tirkeldi jáne 47 537 júrgizýshi kýáligi berildi», dedi N.Qurymbaev.
Eske sala keteıik, budan buryn Batys Qazaqstanda reseı nómirin taqqan kólikterdi 102 myń teńgege tirkep jatyr degen aqparattyń feık ekendigin jazǵan bolatynbyz.
