BQO turǵyndary úsh kúnniń ishinde alaıaqtarǵa 20 mln teńge bergen
Batys Qazaqstan oblysynyń turǵyndary úsh kúnniń ishinde alaıaqtarǵa 20 mln teńgege aldanyp qaldy, dep habarlaıdy Kazinform.
BQO polıtsııa departamentiniń baspasóz qyzmetinen málim etkendeı, osy qysqa merzimde 8 alaıaqtyq deregi tirkelgen.
Sonyń birinde keıýana týysqanyn qylmystyq jaýapkershilikke tartpaý úshin alaıaqqa 8 mln teńgesin berip jibergen.
Ekinshi jaǵdaıda alaıaqtar 30 jastaǵy áıeldiń búkil derekterin bilip alyp, onyń atynan 3 mln teńge kóleminde nesıe rásimdegen.
Qazirgi kezde atalǵan derekter boıynsha tergeý amaldary júrip jatyr.
«Alaıaqtardyń qurbany bolmaý úshin mynadaı qarapaıym erejelerdi este ustaý qajet. Ádette alaıaqtar qalalyq telefondarǵa qońyraý shalyp, ózderin quqyq qorǵaý organdarynyń nemese medıtsına qyzmetkeri retinde tanystyryp, týysqandaryńyzdyń jol apatyna ushyraǵanyn habarlaıdy. Sony jeleý etip shuǵyl aqyly ota jasaý, qylmystyq nemese ákimshilik jaýapkershilikke tartpaý úshin belgisiz bireýler men taksı júrgizýshileri arqyly qolma-qol aqsha berip jiberýdi suraıdy. Tipti «týystaryńyzben» baılanystyryp, solar bolyp sóılesip, aqsha aýdarýdy ótinýi múmkin. Mundaı jaǵdaıda baılanysty dereý doǵaryp, alaıaqtar aıtqan týystarǵa qaıta qońyraý shalý kerek. Olarǵa habarlasa almaǵan jaǵdaıda 102 operatoryna ne polıtsııa bólimine shyǵý qajet. Polıtsııa departamenti alaıaqtarǵa kýrer retinde kómektesetin adamdardyń da qylmystyq jaýapkershilikke tartylatynyn eske salady. Sonymen qatar mobıldi qurylǵylarǵa qońyraý shalyp, ózderin banktiń qaýipsizdik qyzmetkeri retinde tanystyra otyryp, bank shotynyń qaýipsizdigin qamtamasyz etý úshin qosymsha júkteýdi ótinip, kelip túsken kodty aıtýdy suraıtyndar da bar. Oǵan qosa onlaın satyp alý kezinde abaı bolý qajet, ıaǵnı kúmándi satýshylarmen mámile jasamaý kerek. Qajet bolǵan jaǵdaıda turǵyndar 8-711-2-92-19-06, 8-771-249-57-59 nómirleri boıynsha Oral qalasynyń kıberpolıtsııasyna qońyraý shala alady» dep habarlady vedomstvodan.
Eske sala keteıik, budan buryn Oral qalasynyń turǵyny dropperdi ustaýǵa járdemdeskenin jazǵan bolatynbyz.
