BQO: sý tasqynynan zardap shekken turǵyndardan 5 500 ótinish qabyldandy

ORAL. KAZINFORM — Batys Qazaqstan oblysynda sý tasqynynan zardap shekken azamattarǵa jan-jaqty kómek kórsetý jumystary jalǵasýda.

BQO ákiminiń orynbasary Qalııar Aıtmuhambetovtiń aıtýynsha, kúni búginge deıin oblys boıynsha 5 552 ótinish qabyldandy. 1 542 otbasyna 514,5 mln teńge mólsherinde birjolǵy áleýmettik kómek kórsetildi. Bul tólemder jalǵasyn tabady.

Qalııar Shadııarulynyń sózine qaraǵanda, aýdandarda qurylǵan arnaıy komıssııalar 2 342 bas mal shyǵynyn rastady. Sonyń ishinde 341-i – iri qara, 1 741-i – qoı-eshki, 63-i – jylqy, 116-sy – shoshqa, 81-i – úı qustary.

«Qazirgi tańda rastalǵan shyǵyn bolǵan aýyl sharýashylyǵy maldarynyń ólekseleri tolyqtaı joıyldy. Arnaıy komıssııalar óz jumystaryn odan ári jalǵastyrýda. Kelesi apta shyǵyndardy óteý bastalady», - dedi Q.Aıtmuhambetov.

Onyń málimdeýinshe, sý tasqyny bastalǵannan beri zardap shekkenderge 707 tonna nemese 327,3 mln teńgege gýmanıtarlyq kómek ( sonyń ishinde 563 tonna azyq-túlik, 4 tonna dári-dármek, 140 tonna kıim-kıshek) berildi.

«Qyrǵyzstan elinen, sonymen qatar Túrkistan, Almaty, Jetisý, Jambyl oblystary, Astana, Shymkent, Almaty qalalarynan gýmanıtarlyq kómek keldi. Oblys boıynsha 1 gýmanıtarlyq kómek qabyldaý pýnktisi jumys isteýde. Sý tasqynynan zardap shekkenderge 4 myńnan astam volonterlar qolushyn sozýda», - dedi oblys ákiminiń orynbasary.

Eske sala keteıik, budan buryn Jaıyq ózenindegi sý deńgeıi Oralda 860 santımetrden asqanyn jazǵan bolatynbyz.

Oral qalasynda 116 saıajaı birlestigin  sý basty.