BQO: Oral qalasy men eki aýdanda sý tasýyna baılanysty tótenshe jaǵdaı jarııalanýy múmkin
BQO TJ departamentiniń bastyǵy Ernur Ótegenovtiń óńirlik kommýnıkatsııalar qyzmeti alańynda ótken brıfıngte málim etkenindeı, qazirgi tańda oblys ortalyǵyna qosa Báıterek jáne Qaratóbe aýdandarynda tótenshe jaǵdaı jarııalaý qarastyrylýda.
Onyń aıtýynsha, mundaı sharalardy qabyldaý osy aýmaqtarda tótenshe jaǵdaılardy boldyrmaý baǵytynda erte bastan kúsh-quraldy jumyldyrý úshin kerek. Sý basyp ketse, shyǵyn tórt ese kóbeıedi.
2011 jylǵy tasqyn kezinde Oral qalasy men Báıterek, Tasqala aýdandarynda kóptegen úılerdiń sýǵa ketkeni belgili.
«Salystyryp qaraǵanda, 2011 jylǵy sý deńgeıi qazirgiden sál tómen. Kóptegen is-sharalardyń ýaqtyly júrgizilýi nátıjesinde, mysaly, Tasqala aýdanynda sýdyń beti qaıtty. Keshe Derkól ózeninde 18 saǵat ýaqyt ishinde sý eki metrge kóterilip, Tasqala aýylynyń shetindegi úıdiń aýlasyna kirdi. Der kezinde jasalynǵan jumystardyń arqasynda qaýip seıildi. Sol sekildi keshe Báıterek aýdany Asan aýylynda Q.Sátbaev jáne A.Baıtursynov kóshelerindegi úılerdiń aýlalaryna sý keldi. Terekti aýdany Podstepnyı aýylynda da yldı jerde ornalasqan úılerdiń aýlalarynan motopompamen sý soryldy. Taǵy bir aıta ketetin jaıt, Terekti, Aqjaıyq jáne Qaratóbe aýdandarynda jol boıyndaǵy turbalardyń kólemi sýdy ótkizýge saı kelmeıdi. Sondyqtan eki jaqtaǵy kólik qozǵalysyn shektep, joldy jyrý jumystary atqarylady. Munyń aldynda Bókeı ordasy men Jańaqala aýdandarynda osyndaı shara qabyldanyp, qazirgi ýaqytta joldar qalpyna keltirildi», dedi E.Ótegenov.
Oral qalasy ákiminiń orynbasary Jandos Dúısenǵalıev shahar aýmaǵynda sý basýy múmkin 86 ýchaske bolsa, sonyń 75-i baý-baqsha seriktestiginiń negizgi bóligi ornalasqan ózen jaıylmalarynda ekendigin jetkizdi. Olarda 20 839 adam turaqty turady. Tótenshe jaǵdaılardyń aldyn alý úshin túsindirme jumystary júrgizildi.
Kúni búginge deıin qala aýmaǵynda 8 jeke turǵyn úıge sý kirý deregi tirkeldi, munyń sebebi – irgetasy alasa, aýlalardan qar ýaqtyly shyǵarylmaǵan. Sol sekildi qala boıynsha 9 ǵımarattyń jertólesine kirgen sý soryldy. Zardap shekkender joq. Qazirgi kezde №49 mekteptiń jertólesinen sý sorylýda.
Oblysta tasqynǵa qarsy is-sharalar jalǵasýda.
Eske sala keteıik, budan buryn Oral qalasynda sý kestemen beriletinin jazǵan bolatynbyz.
Sondaı-aq Batys Qazaqstanda jaǵdaı kúrdelene tústi.
Oralda medkolledj jataqhanasyna sý kirdi.