BQO-da 1500 oryndyq jaıly mektep qoldanysqa berildi
ORAL. KAZINFORM – Batys Qazaqstan oblysynda «Jaıly mektep» jobasy aıasynda salynǵan jańa mektep qoldanysqa berildi.
Zamanaýı úlgide boı kótergen №51 mektep Oral qalasynyń Derkól kentinde ornalasqan. Saltanatty sharaǵa oblys ákimi Narıman Tóreǵalıev qatysyp, mektep ujymyn, oqýshylar men ata-analardy jańa bilim ordasynyń ashylýymen quttyqtady.
– Memleket basshysy Qasym-Jomart Toqaev Qazaqstan halqyna Joldaýynda «Orta bilimniń sapasy – tabysty ult bolýdyń mańyzdy faktory. Árbir oqýshynyń bilim alyp, jan-jaqty damýy úshin qolaıly jaǵdaı jasalýǵa tıis»,- dep atap aıtqan bolatyn. Osy baǵytta oblysymyzda jańa mektepter salynyp, bilim oshaqtaryna kúrdeli jóndeý jumystary júrgizilýde. Batys Qazaqstan oblysynda 2 jyl ishinde jańa 22 orta mektep boı kóterdi. 2025 jyly «Jaıly mektep» jobasy aıasynda 6 mekteptiń qurylysy jalǵasyn tabady, - dedi óńir basshysy Narıman Tóreǵalıev.
Jańa mektep 1500 orynǵa laıyqtalyp, zamanaýı quraldarmen jabdyqtalǵan. Kólemi 15 myńnan astam sharshy metr ǵımaratta pándik kabınettermen qosa 4 sport zaly, birneshe sheberhanalar men kovorkıng alańdary, kitaphana, májilis zaldary bar. Oqýshylar úshin barlyq jaǵdaı jasalǵan.
Mekteptiń ashylýyna qatysqan bilim salasynyń ardagerleri sońǵy jyldary óńirde bilim salasynda aýqymdy jumystar atqarylyp jatqanyn atap ótti.
– Bizdiń qalamyzda osyndaı úlken, keń, jaryq, zaman talabyna saı salynǵan mekteptiń ashylǵanyna qýanyshtymyz. Ásirese, balalarymyz dán rıza. Rasymen, sońǵy jyldary Batys Qazaqstan oblysynda aýqymdy jumystardyń atqarylǵanyna kózimiz jetti. Sol sebepti, Prezıdentimiz Qasym-Jomart Toqaevqa, osy qurylys jumystaryn júrgizgen jandarǵa alǵysymdy bildiremin, - dedi bilim salasynyń ardageri Qaırolla Aıtqalıuly.
Eske sala keteıik, buǵan deıin Túrkistanda taǵy bir jaıly mektep ashylǵanyn jazǵan bolatynbyz.