BQO-da jeti myńǵa jýyq adam «Qaztest» synaǵynan ótpek
Oblystyq tilderdi damytý basqarmasynyń bólim basshysy Gúlnár Áljanovanyń aıtýynsha, «Qaztest» - memlekettik mekeme qyzmetkerleri ǵana emes, barlyq qurylymdarda qyzmet etetin azamattarǵa mindetti emtıhan.
Ras, buryn bul synaqty tek memlekettik organ qyzmetshileri tapsyryp kelgen edi. 2016 jyly 23 jeltoqsanda Baqytjan Saǵyntaevtyń tóraǵalyǵymen ótken Úkimettegi jıyn qorytyndysyna sáıkes arnaıy hattamalyq tapsyrma oblystarǵa berildi. Soǵan sáıkes 2017 jyldyń 1 qańtarynan bastap ár salanyń mamandary úshin memlekettik tildi bilý deńgeıin anyqtaıtyn ulttyq standart bekitildi.
Osylaısha, «Qaztest» synaǵyn tapsyrýdyń barlyq sala qyzmetkerlerine mindettelýi olardyń memlekettik tildi bilýdegi jaýapkershiligin odan saıyn arttyryp otyr. Bul jumys respýblıkada 2018 jyldan bastalady. Batys Qazaqstan oblysynda 2017 jyly bastalyp, 7 131 adam «Qaztest» synaǵynan ótti.
Bıyl óńirde synaq 5-17 aqpan aralyǵynda ótedi. Jáńgir han atyndaǵy Batys Qazaqstan agrarlyq-tehnıkalyq ýnıversıtetinde alǵashqy kúni 846 adam synaq tapsyrsa, olardyń sany búgin de odan kem emes. Mysaly, mamandandyrylǵan kúzet qyzmeti, temirjol, qylmystyq-atqarý júıesi, basqarma-departamentter, BAQ-tan «Jaıyq Press» JShS qyzmetkerleri, 2029-áskerı bólimi men Ulttyq ulan jaýyngerleri jáne basqalar synaqtan ótti. Olardyń arasynda ózge ult ókilderi de joq emes.
«Qaztest» synaǵy Oral qalasynda ǵana emes, Jańaqala, Syrym, Jánibek, Qaratóbe, Bókeı ordasy aýdandarynda da jalǵasyn tabady.
