BQO-da Táýelsizdik monýmenti ashyldy
Táýelsizdik saıabaǵynda oryn tepken monýmenttiń ashylý rásimine qatysqan QR Investıtsııalar jáne damý mınıstrligi Indýstrııalyq damý jáne ónerkásiptik qaýipsizdik komıtetiniń tóraǵasy Amanııaz Erjanov ata-babalarymyz armandaǵan azattyqtyń qazaq halqyna ońaılyqpen kelmegenin, Elbasynyń bastaýymen Qazaq eli shırek ǵasyr ishinde tolaǵaı tabystarǵa qol jetkizgenin atap ótti. Osy oraıda eldigimizdiń eńsesi bıik ekendigin pash etetin mundaı eskertkishterdiń mańyzy erekshe.
Jańaqala aýdany ákimdiginiń qoldaýymen ornatylǵan Táýelsizdik monýmentine aýdandyq bıýdjetten 4,8 mln. astam teńge bólinip, ony «Progress standart» JShS úsh aı merzimde turǵyzdy. Bıiktigi 12 metr eskertkishtiń qaq ortasynda qorǵan beınelense, ushar basynan Altyn adamnyń beınesi kórinedi. Sondaı-aq memlekettik Eltańba, Tý men Gımn de qalys qalmaǵan.
Jańaqala aýylynda bul kúni sondaı-aq salynyp bitken turǵyn úılerge tartylǵan syrtqy ınjenerlik jeliler júıesi ashyldy. Bul qurylysqa jergilikti bıýdjetten 117,1 mln. astam teńge qaralyp, jobaǵa sáıkes 334 úıge aýyz sý, jalpy uzyndyǵy 32,7 shaqyrym sý qubyry tartyldy.
Aýdandyq mádenıet úıinde Jańaqala aýdanynyń entsıklopedııasy men «Qamys-Samar-Jańaqala: ótkeni men búgini» atty tarıhı-tanymdyq jınaqtyń tanystyrylymy boldy. Aýdan ákimi Lavr Haıretdınov qos kitaptyń shyǵýyna atsalysqan aýdandyq máslıhat hatshysy, aqyn Zakarııa Sısenǵalı men Almatydan arnaıy kelgen respýblıkalyq «Arys» baspasynyń dırektory, fılologııa ǵylymdarynyń doktory Ǵarıfolla Áneske alǵysyn bildirdi. Aýdan tarıhy men tanymal tulǵalaryna qatysty kitaptar «Arys» baspasynan buǵan deıin de jaryq kórgen bolatyn. Osy eńbegi eskerilgen Ǵ.Áneske «Jańaqala aýdanynyń qurmetti azamaty» ataǵy berildi.
Taǵy bir ıgilikti is, táýelsizdiktiń torqaly toıyna oraı jergilikti qazynadan bólingen 3,5 mln. astam teńgege bos turǵan ǵımarat kúrdeli jóndelip, jańartylǵan orynda Jańaqala aýdandyq tarıhı-ólketaný murajaıy ashyldy. Oǵan qosa «Qazaqstan Halyq banki» AQ jergilikti bólimshesiniń kúrdeli jóndelgen ǵımaraty jáne jıhaz jasaý tsehy da óz esikterin aıqara ashty.
