BQO-da sýbsıdııaǵa bólingen qarajat maqsatsyz paıdalanylǵan
ORAL. KAZINFORM — Batys Qazaqstan oblysynda Shyńǵyrlaý aýdanynyń prokýratýrasy sýbsıdııa berý kezinde zańdylyqtyń saqtalýyn taldaý nátıjeleri boıynsha 20 mln astam teńge kóleminde bıýdjet qarajatyn teris paıdalaný faktilerin anyqtady.
BQO prokýratýrasynyń baspasóz qyzmetinen málim etkenindeı, mysaly, 2021 jyly 25 jeltoqsanda sharýa qojalyǵy 442 asyl tuqymdy qoı satyp alýǵa ótinish berip, 6 mln 630 myń teńge kóleminde sýbsıdııa alǵan. Taldaý barysynda bir jyldyń ishinde aýyl sharýashylyǵy janýarlaryn birdeılendirý jónindegi derekqordan atalǵan maldyń esepten shyǵarylǵany belgili boldy.
Prokýratýra málimetine sáıkes, Aýyl sharýashylyǵy mınıstriniń 2019 jylǵy 15 naýryzdaǵy buıryǵymen bekitilgen asyl tuqymdy mal sharýashylyǵyn damytýdy, mal sharýashylyǵynyń ónimdiligin jáne ónim sapasyn arttyrýdy sýbsıdııalaý qaǵıdalaryn bekitý týraly erejege sáıkes mal basynyń jyl boıy saqtalýyn (mal shyǵynynyń zootehnıkalyq normasyn qospaǵanda) qamtamasyz etý mindettelgen. Osy talaptyń buzylýy saldarynan memleketke 6 mln 630 myń teńge materıaldyq shyǵyn keltirildi.
«Zańdy buzý faktileri boıynsha quzyretti organǵa tıisti qadaǵalaý aktisi engizildi. Kúni búginge deıin prokýratýranyń usynýy boıynsha memleketke 14,7 mıllıon teńge qaıtaryldy. Qalǵan somany óndirý atqarýshylyq is júrgizý tártibinde júrgizilýde», — dep habarlady vedomstvodan.
Eske sala keteıik, budan buryn BQO-da mektep psıhologtarynyń kóbi syrttaı bilim alǵanyn jazǵan bolatynbyz.