BQO-da sý tasqynynan zardap shekkenderge quqyqtyq kómek kórsetetin mobıldi pýnkt ashyldy
ORAL. KAZINFORM – Batys Qazaqstan oblysynyń prokýratýrasy jergilikti atqarýshy jáne quqyq qorǵaý organdary qyzmetkerleriniń qatysýymen sý tasqynynan zardap shekken azamattarǵa quqyqtyq kómek kórsetetin 4 kóshpeli mobıldi qabyldaý pýnktin qurdy.
Prokýratýranyń málimetinshe, qazirgi ýaqytta 24 baý-baqsha seriktestigi men Krýgloozernoe aýylyn qosqanda 94 azamat qabyldanyp, quqyqtyq keńes alǵan.
«Turǵyndar evakýatsııalaý, áleýmettik tólemder kórsetý, sýdyń kelýi, zalaldyń ornyn toltyrý, nesıeni keıinge qaldyrý jáne jer ýchaskesin resimdeý máseleleri boıynsha júgindi», — delingen habarlamada.
Qabyldaý barysynda turǵyndarǵa tólemder tártibi jáne evakýatsııalyq pýnktterdiń ornalasqan jeri túsindirildi.
«eGOV» mobıldi qosymshasy arqyly zalaldy óteýge ótinim berýge kómek kórsetildi.
Málim bolǵandaı, «Kabachok» baý-baqsha seriktestiginiń turǵyndary sý basqan úılerden múlikti qutqarý jóninde kómekke júgingen.
«Kóshpeli qabyldaý ortalyǵynda TJD-niń qyzmetkerleri de túsindirý jumystaryn júrgizip, nusqama bergen. Atalǵan qadamnan keıin birqatar másele sheshildi», — dep habarlady jergilikti prokýratýranyń baspasóz qyzmeti.
Prokýratýra mamandary Balalar quqyqtary jónindegi ýákilmen birlesip, 2 evakopýnktte halyqpen júzdesti. Olarǵa tólemder men kómek alý tártibin túsindirdi. Evakýatsııa pýnktteri Jáńgirhan ýnıversıtetiniń jataqhanasy men Pedagogıkalyq kolledjde ornalasqanyn eske sala ketken jón.
Saıajaı alaptarynyń turǵyndarymen túsindirý júrgizý arqyly Abaı oblysynan gýmanıtarlyq kómek kelý kezinde týyndaǵan 1 kelispeýshilik retteldi.
Mobıldi qabyldaý bólmesi azamattarǵa quqyqtyq kómekke júginýge jáne qoldaý sharalary, múliktiń qaýipsizdigin qamtamasyz etý jáne basqa da qajetti aqparat alýǵa múmkindik beredi.
«Biz zardap shekkenderge jan-jaqty kómek kórsetýge daıyn ekenimizdi bildiremiz jáne qoldaýdy qajet etetinderdiń barlyǵyn mobıldi qabyldaý bólmesine júginýge shaqyramyz. Azamattardy qabyldaý kún saıyn saǵat 09.00-den 19.00-ge deıin myna mekenjaılar boıynsha júzege asyrylady: 1,2,3 saıajaı, sh/a. Et kombınaty, Teletsentr jáne Komıntern», - dep habarlady prokýratýra.
