BQO-da sý tasqynyna qarsy jumystarǵa stýdentter de atsalysyp jatyr
ORAL. KAZINFORM — Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń ujymy óńirde sý tasqynyna baılanysty qoldan kelgen kómekterin usynyp jatyr.
Tótenshe jaǵdaı bolǵannan beri ýnıversıtette professor-oqytýshylar quramynan, qyzmetkerler men stýdenttik ózin-ózi basqarý uıymdarynan arnaıy shtab quryldy.
Qarǵyn sý eldi mekenderge qaýip tóndirgen alǵashqy kúnderden bastap stýdentter Qaratóbe aýdanyndaǵy zardap shekken halyqqa gýmanıtarlyq kómek qoryn jetkizýge járdemdesti.
Ýnıversıtettiń tárbıe jáne áleýmettik jumystar jónindegi prorektory Aqylbek Sultanovtyń aıtýynsha, tasqyn sý qaýpi seıilmegen osyndaı syn saǵatta ózderiniń jaýapkershilikterin, azamattyq paryzdaryn sezingen JOO qyzmetkerleri, «Áskerı kafedra» sarbazdary, volonterler men jataqhanada turatyn bilim alýshylar ózen jaǵasyndaǵy bógetterdi bıiktetýge járdemdesken. Sondaı-aq sý tasqyny qaýpi bar aýmaqtarda qorǵanysty kúsheıtý, evakýatsııalyq oryndardy daıyndaý jumystaryna da kómektesip jatyr.
Eriktiler kúndelikti qapshyqtarǵa qum toltyrý, Zachagan kentinen ótetin Jaıyq ózeniniń arnasyn bıiktetý, Batys Qazaqstanǵa kelip jetken gýmanıtarlyq kómekterdi júk kóliginen túsirý jáne halyqqa taratý jumystaryna belsene qatysýda. Sondaı-aq ýnıversıtet ustazdary bilim alýshylarmen birge Zachagan kentindegi «Arman» jekpe-jek sport saraıyndaǵy evakýatsııalyq beketke ornalastyrylǵan adamdarǵa azyq-túlik pen turmystyq kerek-jaraqtaryn jetkizip berdi. Jalpy, bul jumystar sý tasqynynyń qaýpi seıilgenge deıin jalǵasady.
Zardap shekken jerlesterge qoldaý kórsetý maqsatynda ýnıversıtet ujymy erikti túrde bir kúndik jalaqylaryn aýdaryp, ıgilikti iske úles qosty. Sý tasqynynan zardap shekken halyqty ýaqytsha ornalastyrýǵa arnalǵan 100 adamdyq evakýatsııalyq oryn da daıyn tur.
«Biz qashanda jerlesterimizben birgemiz. Osyndaı birikken kúshtiń, tózim men sabyrdyń arqasynda bul qıyndyqty da eńseremiz degen senim mol», - dedi A.Sultanov.
Eske sala keteıik, budan buryn veterınarlar Oral qalasynda qum toltyrylǵan 125 myń qapshyq daıyndalǵanyn habarlaǵan bolatynbyz. Sondaı-aq sý basqan aýmaqtarda juqpaly aýrý juqtyrmaý úshin ne isteý keregin jazǵan edik.
