BQO-da sý tasqyny jaǵdaıyna baılanysty oqý protsesteri toqtamaıdy

ORAL. KAZINFORM - Batys Qazaqstan oblysynda sý tasqynyna baılanysty mektep oqýshylarynyń bilim alýy biraz turǵyndy alańdatty. Alaıda, oqý protsessi toqtamady, keı mektepterde qashyqtan oqytý ádisi boıynsha júıeli jumystar atqarylsa, keıbirinde balalar dástúrli oqytý boıynsha bilim alyp jatyr. Bilim sapasy tómendemeıdi.

Qazirgi tańda óńirde sý tasqynynan zardap shekken aýyldardaǵy 13 mektepte 4 132 oqýshy qashyqtan bilim alýda. Sonyń ishinde Bórli aýdanynda 2 mektep jáne Terekti aýdanynda 8 mektep atalǵan qashyqtan oqytý formatynda jumys istep jatyr.

Qaratóbe aýdanyndaǵy 104 oqýshyǵa sabaq aýdan ortalyǵyndaǵy dástúrli oqytý formatynda júrip jatyr. Sonymen qatar Bórli aýdanyndaǵy Aqsý aýylynan 66 bala Aqsaı qalasyndaǵy №5 mektep janyndaǵy ınternatynda jatyp bilim alýda. Bıyl sáýir aıynyń 1-inen bastap oblystyq daryndy balalarǵa arnalǵan mamandandyrylǵan mektep-lıtseı-ınternatynyń oqýshylaryna kúndelikti sabaq oblystyq mektep-lıtseı-ınternatynda júrgizilýde.

Sondaı-aq oblystyq estý qabileti buzylǵan balalarǵa arnalǵan mektep-ınternatynda 53 oqýshy jatyp, al 187 oqýshy úıden qatynap oqyp júr.

Retti jerinde aıtaıyq, evakýatsııalanǵan balalarǵa mektepterdegi pedagog-psıhologtar psıhologııalyq qoldaý kórsetýde jáne qosymsha bilim berý ortalyqtary arqyly ártúrli baǵytta úıirmeler uıymdastyrylýda. Oblystaǵy tótenshe jaǵdaı jarııalanǵan aýdan mektepterinde sáýirdiń 8-inen bastap dástúrli oqytý formatyna kóshirý josparlanyp otyr.