BQO-da sý basý qaýpi bar 147 eldi meken baqylaýǵa alyndy
ORAL. KAZINFORM – Batys Qazaqstan oblysynda sý basý qaýpi bar 147 eldi meken, 49 avto jáne temirjol ýchaskeleri baqylaýǵa alyndy.
BQO TJ departamenti bastyǵynyń orynbasary Qanat Qarabalaevtyń óńirlik kommýnıkatsııalar qyzmeti alańynda ótken brıfıngte málim etkenindeı, olardyń barlyǵyna jaýapty adamdar bekitilip, qajetti tehnıka, quraldar, qapshyqtar ázirlendi.
Qanat Málikaıdarulynyń sózine qaraǵanda, eldi mekenderden 400 myń tekshe metr qar shyǵaryldy. Aryqtar men kanaldar, sý ótkizý qubyrlary tazalanyp jatyr.
«Kosmomonıtorıng qyzmetterin alýǵa, muz jarý jumystaryn júrgizýge (35 mln teńge, 25 ýchaske, «ERA BVR» JShS), tikushaq qyzmetterine shart jasaldy. Jalpy jaǵdaı erekshe baqylaýda jáne sý tasqynyna qarsy jumystar jalǵasýda»- dedi Q.Qarabalaev.
Onyń aıtýynsha, barlyǵy 1 050 tehnıka, 88 júzý quraly, 12 aspaly motor, 329 motopompa jáne 4 043 jeke quram daıyndyqqa keltirildi. 23 374 tonna ınertti materıaldar, 192 710 dana qap, 557 tonna janar-jaǵar maı ázirlendi.
«Departamentpen barlyǵy 63 tehnıka, 36 júzý quraly, 70 motopompa men jeke quramnyń 305 adamy daıyndaldy. Tehnıkamen, qajetti kıim-keshekpen jáne jabdyqpen qamtamasyz etilgen olar jedel toptardyń quramynda 4 baǵyt boıynsha bólingen, jaǵdaı qıyndaǵan jaǵdaıda shuǵyl kómek kórsetetin bolady» - dedi Qanat Qarabalaev.
