BQO-da Shoqyný merekesinde sýǵa túsetin arnaıy oryndar belgilendi

ORAL. QazAqparat – Batys Qazaqstan oblysynda pravoslav hrıstıandarynyń Shoqyný meıramy kezinde sýǵa túsetin arnaıy oryndar belgilendi, dep habarlaıdy QazAqparat tilshisi.

BQO Tótenshe jaǵdaılar departamenti Tótenshe jaǵdaılardy joıý basqarmasynyń bastyǵy Baqytjan Ihsanovtyń málim etkenindeı, mereke kúni turǵyndardyń qaýipsizdigin qamtamasyz etý mańyzdy.

Osy oraıda oblysta sýǵa túsetin arnaıy 31 oryn belgilense, sonyń 14-i Oral qalasynda ornalasqan.

Onyń sózine qaraǵanda, sý aıdyndarynda muzdyń qalyńdyǵy ártúrli (16-dan 36 sm-ǵa deıin). Sondyqtan BQO TJ departamenti jergilikti eparhııaǵa sýǵa túsetin oryndardy jabdyqtaý (tutqasy, joly bar aǵash baspaldaq ornatýmen birge bıiktigi keminde 20 santımetr brýstver, sondaı-aq jaǵalaýda nemese oǵan jaqyn jerde kıim aýystyratyn oryndar ázirleý) týraly usynys engizdi.

«Atalǵan oryndarda TJ departamentinen 78 qyzmetker 10 tehnıkamen kezekshilikte bolady. Polıtsııa departamentimen jáne oblystyq densaýlyq saqtaý basqarmasymen birlesip atqarylatyn jumystar pysyqtaldy. Barlyq is-sharalar kezinde koronavırýstyń taralýyna jol bermeý maqsatynda karantındik talaptar tolyq oryndalýy tıis»,- dedi B.Ihsanov.

BQO Sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń aıtýynsha, sýǵa túsetin orynda adamdar sany onnan aspaýy jáne araqashyqtyq saqtalýy kerek. Sondaı-aq turǵyndarǵa shomylmaı-aq sýdy ózimen alyp ketip, dinı rásimdi úıde oryndaý usynylady. Ásirese, adamdar ózin jaısyz sezinse, sýǵa túspegeni jón.

Eske sala keteıik, budan buryn Batys Qazaqstanda bir kompanııanyń 47 qyzmetkerinen koronavırýs tabylǵanyn, juqpaly aýrýlar statsıonarynda 260 adam emdelip jatqanyn jazǵan bolatynbyz.

Óńirde epıdemıologııalyq ahýal turaqsyz bolyp otyr. Ótken táýlikte oblysta 49 adamnyń koronavırýs juqtyrǵany tirkeldi.