BQO-da shekarada qyzmetine salǵyrt qaraǵan áskerı qyzmetshi qamaýǵa alyndy
ORAL. KAZINFORM — Oral qalasynyń ákimshilik quqyq buzýshylyqtar jónindegi mamandandyrylǵan sotynda QR UQK BQO boıynsha Shekara qyzmeti departamentiniń áskerı qyzmetshisine qatysty ákimshilik is qaraldy.
BQO sotynyń baspasóz qyzmetinen málim etkenindeı, kelisimshart negizinde qyzmet etetin B. degen áskerı qyzmetshi «Tasqala» ótkizý beketinde kezekshilik kezinde kólik quralynyń júk bólimin muqııat tekserýge mindetti bolǵan.
Alaıda ol formaldy túrde tekserip, tirkemeniń ishine kirip, júktiń aralaryn qaramaǵan. Osy salǵyrttyqtyń saldarynan Qazaqstan Respýblıkasynyń memlekettik shekarasy arqyly Reseı Federatsııasyna júk arasyna jasyrylǵan Ózbekstannyń tórt azamaty zańsyz ótip ketken. Keıin quqyq buzýshylardy Reseı Federatsııasynyń shekara qyzmetkerleri ustady.
Oqıǵa boıynsha júrgizilgen qyzmettik tekserý B-nyń áreketindegi salǵyrttyqty dáleldedi. QR Qylmystyq kodeksiniń 445-babynyń 1-bóligi boıynsha qozǵalǵan qylmystyq is qylmys quramynyń bolmaýyna baılanysty toqtatyldy. Áıtse de onyń áreketi QR Ákimshilik quqyq buzýshylyq týraly kodeksi 652-babynyń 6-bóligine sáıkes ákimshilik quqyq buzýshylyq retinde baǵalandy.
- Sot otyrysynda B. óz kinásin tolyq moıyndap, kezekshilik kezinde júkterdi durys tekserý týraly buıryqty oryndamaǵanyn jetkizdi. Sot is materıaldaryn zertteı kele, áskerı qyzmetshiniń basshynyń buıryǵyn qasaqana oryndamaǵanyn anyqtady. Bul áreket qyzmet múddesine eleýli zııan keltirmegenimen, jaýapkershilikke tartýdy talap etedi. Zańǵa sáıkes mundaı buzýshylyq úshin 15 táýlikke deıin ákimshilik qamaý nemese aıyppul qarastyrylǵan. Іstiń mán-jaılaryn eskere otyryp, sot azamat B-ny 7 táýlikke ákimshilik qamaý jazasyn taǵaıyndaý týraly sheshim shyǵardy. Bul sheshim memlekettik qaýipsizdikti qamtamasyz etýge qatysty máselelerde qyzmettik mindetterdi qatań oryndaýdyń mańyzdylyǵyn kórsetedi. Sot qaýlysy zańdy kúshine endi, - dep habarlady vedomstvodan.
Eske sala keteıik, budan buryn Oralda órt qaýipsizdigi talaptaryn buzǵan kompanııaǵa aıyppul salynǵanyn jazǵan bolatynbyz.