BQO-da shekara mańyndaǵy turǵyndar maly Reseıge ótip ketip jatyr
ORAL. KAZINFORM – QR Parlamenti Májilisiniń depýtaty Serik Erýbaev Batys Qazaqstan oblysyna jumys sapary kezinde Kaztalov aýdanynyń ózekti máselelerimen tanysty.
Aýdan ákimi Aslanbek Sarqulov kezdesýde aýdandaǵy basty másele kıiktiń basym bóliginiń shoǵyrlanýy men sý qorynyń azdyǵy ekenin basa aıtty.
Onyń sózine qaraǵanda, joǵarydan kelgen sý qoryn jınaqtaý maqsatynda Jalpaqtal sý qoımasyn salý josparlanyp otyr. Joba kólemi – 28 mln tekshe metr.
Májilis depýtaty sý qoımasynyń jobasymen tanysyp, Qaraózendegi sý qoryn baqylady. Atalmysh jobany «Qazsýshar» RMK BQO fılıaly Kaztalov ýchaskesiniń bastyǵy Erkebulan Ermuhanov tanystyrdy. Serik Sársenuly máseleni jan-jaqty zerdelep, salalyq mınıstrlikke tıisti usynymdar beretinin jetkizdi.
Májilistiń sot-quqyqtyq reformalar jónindegi komıtetiniń múshesi Serik Erýbaev jumys sapary barysynda «Kaztalov-Fomın» ótkizý beketine bardy.
Aýdan basshysy Aslanbek Ahmetollauly depýtatqa atalǵan ótkizý beketi jóninde aqparat berip, beketti jóndeýden ótkizý, qorshaý, shekaraǵa deıin joldy asfalttaý jóninde másele kóterdi. Al aýdandyq máslıhat depýtaty Dýlat Rahmatýllın shekaradaǵy qorshaýdyń joqtyǵy sharýalarǵa da qıyn soǵyp otyrǵanyn tilge tıek etti.
— Shekara – strategııalyq mańyzy bar aımaq. Al shekara mańyndaǵy aýyldar men eldi mekenderdegi sharýalar qorshaýdyń joqtyǵynan zardap shegýde. Óıtkeni shekara mańyndaǵy aǵaıynnyń maly Reseı Federatsııasyna ótip ketip jatyr. Onyń ústine joldy jóndeýden ótkizý qajet. Shekarashylardyń da materıaldyq-tehnıkalyq bazasyn jańartý, nyǵaıtý kerek. Bul halyqtyń qaýipsizdigi, quqyǵyn qorǵaý úshin mańyzdy. Osy oraıda geosaıası ahýaldy eskergenimiz jón, — dedi D.Rahmatýllın.
Qazirgi tańda «Kaztalov-Fomın» ótkizý beketinen juma, senbi, jeksenbi kúnderi kúnine shamamen 20-dan astam azamat shekara arqyly kórshi memleketke ótedi. Jergilikti atqarýshy jáne ókiletti organnyń pikirine qulaq túrgen Serik Erýbaev máseleni sheshýge atsalysatynyn aıtty.
Májilistegi «Aq jol» partııasy fraktsııasynyń múshesi sondaı-aq «Sartaev» jeke kásipkerliginiń balyq sharýashylyǵyn damytý jobasymen tanysty. Jeke kásipker Álibek Sartaev Sokryl kóli mańynan demalys aımaǵyn iske qosyp, qonaq úıdiń qurylysyn júrgizýde. Sonymen qatar kásibı mamandardyń qatysýymen balyq sharýashyǵyn damytýǵa den qoıyp otyr. Serik Sársenuly kásipkerdiń ıdeıasy qoldaýǵa turatynyn atap ótti.
— Prezıdentimiz Qasym-Jomart Kemeluly elimizde balyq sharýashylyǵyn damytýǵa den qoıý qajettigi jóninde Úkimetke naqty mindetter júktedi. Parlament qabyrǵasynda da balyq ósirý sharýashylyǵyn damytý máselesi keńinen talqylandy. Aýyldyq jerde balyq ósirý kásibin iske qosý – óte oryndy bastama. Zań kabınette otyryp qabyldanbaýy tıis. Sondyqtan biz óńirlerge jumys sapary barysynda halyqpen, kásipkerlermen, jergilikti atqarýshy jáne ókiletti organdarmen kezdesip, usynystardy jınaqtaýdamyz. Sizderdiń balyq ósirýge, damytýǵa qatysty usynystaryńyzdy Májiliste kóterip, salalyq mınıstrliktermen birlese jumystanatyn bolamyz, — dedi halyq qalaýlysy.
Eske sala keteıik, budan buryn Májilis depýtatynyń Oraldaǵy «Aqjaıyq» shaǵynaýdanynyń qurylys barysymen tanysqanyn jazǵan edik.