BQO-da sáýlet-qurylys talaptaryn buzǵandarǵa 19,7 mln teńge aıyppul salyndy
BQO memlekettik sáýlet-qurylys baqylaýy basqarmasynyń basshysy Mádı Otarbaevtyń óńirlik kommýnıkatsııalar qyzmeti alańynda ótken brıfıngide málim etkenindeı, bıyl 54 tekserý júrgizilip, anyqtalǵan buzýshylyqtardy joıý týraly 32 nusqama berildi.
Onyń sózine qaraǵanda, 79 ákimshilik is qozǵalyp, sonyń nátıjesinde 19 mln 794,637 myń teńge aıypul salyndy.
Jyl basynan beri 378 aryz-shaǵym, sonyń 258-i jeke adamdardan, 120-sy zańdy tulǵalardan tústi. Bul – ótken jylǵydan (348) edáýir artyq.
Basqarma basshysynyń aıtýynsha, 2021 jyly sáýlet, qala qurylysy jáne qurylys qyzmeti nysandaryna qatysty jospardan tys 33 tekserý júrgizilip, 22 nusqama berildi. 179 ákimshilik is qozǵalyp, 26 mln 181,665 myń teńge aıyppul salynǵan bolatyn.
Respýblıka aýmaǵynda 2023 jyldyń 1 qańtaryna deıin Prezıdent Jarlyǵymen shaǵyn kásipkerlik nysandaryna barý arqyly tekserýler, profılaktıkalyq baqylaý men qadaǵalaý júrgizýge moratorıı engizilgeni belgili. Jarlyqqa sáıkes baqylaý jáne qadaǵalaý organdarynyń qyzmetine tekserýler taǵaıyndaý turǵysynan túzetýler engizdi, ıaǵnı tekserýler sany aıtarlyqtaı azaıdy.
«Zańnamaǵa sáıkes sáýlet-qurylys baqylaý jáne qadaǵalaý organdary bergen nusqamalar Qazaqstan Respýblıkasynyń aýmaǵyndaǵy osy saladaǵy barlyq nysandardyń oryndaýy úshin mindetti. Zańdy talaptardy nemese nusqamalardy oryndamaý nemese tolyq oryndamaý QR Ákimshilik quqyqbuzýshylyq týraly kodeksi 462-babynyń 3-bóliginde kózdelgen jaýaptylyqqa ákep soǵady, ıaǵnı bul ruqsattyń qoldanysyn toqtata turyp nemese onsyz, ne qyzmetti nemese jekelegen qyzmet túrlerin toqtata turyp nemese onsyz kásipkerlik nysanynyń sanatyna qaraı 5 AEK-ten 500 AEK-ke deıin aıyppul salynady», dedi M.Otarbaev.
Onyń aıtýynsha, Oral qalasy men shahar mańynda 110-daı kóppáterlik úı salynýda, bularǵa qurylys-montaj júrgizýge ruqsat berildi. Sonymen qatar ruqsat berý qujattarynsyz kóppáterlik úı salýdyń 2021 jyly – 14, bıyl 8 deregi tirkeldi. Bulardyń bári boıynsha ákimshilik is qozǵalyp, zańnama buzǵandarǵa aıyppul salyndy. Іster tıisti sheshim qabyldaý úshin sotqa joldandy.