BQO-da respýblıkalyq joldarda sý basýy múmkin ýchaskeler bar ma
ORAL. KAZINFORM – Batys Qazaqstan oblysynda halyqaralyq jáne respýblıkalyq mańyzy bar avtomobıl joldarynyń jalpy uzyndyǵy – 1 349 shaqyrym. Kóktemgi tasqyn kezinde osy joldardyń sý basýy múmkin tustary bar ma, bul jóninde Kazinform tilshisine «Jol aktıvteriniń ulttyq sapa ortalyǵy» RMK BQO fılıalynyń bólim basshysy Dáýren Ámirov aıtyp berdi.
Dáýren Manarbekulynyń sózine qaraǵanda, atalmysh avtomobıl joldary jelisinde jalpy uzyndyǵy 6 796 metr bolatyn 50 kópir jáne 525 sý ótkizý qubyry (jalpy uzyndyǵy – 10 714 metr) ornalasqan.
2026 jylǵy kóktemgi tasqyn kezeńinde erigen jáne tasqyn sýlardyń qaýipsiz ári kedergisiz ótýin qamtamasyz etý maqsatynda fılıal halyqaralyq jáne respýblıkalyq mańyzy bar avtomobıl joldarynyń qaýipti ýchaskelerin daıyndaý jónindegi is-sharalar josparyn ázirlep, «QazAvtoJol» UK» AQ jáne «QAJservıs» JShS-men kelisip bekitti.
Onyń aıtýynsha, 2024 jyly Aqtóbe-Oral-RF shekarasy («Syrym» ótkizý beketi) jáne Podstepnyı-Terekti-RF shekarasy («Aqsaı» ótkizý beketi) avtomobıl jolynyń úsh ýchaskesinde sý basý derekteri oryn aldy. Atap aıtqanda, sol jyly 26 naýryzda Aqtóbe-Oral-RF shekarasy avtojolynyń 479-shaqyrymynda sý (eni 50 metr, bıiktigi 10 sm) shyǵyp ketti.
– Sol sekildi 2024 jyly 31 naýryzda Podstepnyı-Terekti-RF shekarasy jolynyń 11 (eni 80 metr, bıiktigi 5-9 sm) jáne 13-shaqyrymy (eni 170 metr, bıiktigi 30-40 sm) tusynda sý basty. Osy joldy rekonstrýktsııalaý jobasy aıasynda 11 jáne 13 km-de dıametri 0,7 metr bolatyn sý ótkizetin eki kózdi temir qubyrlardy qosymsha ornatý týraly sheshim qabyldandy. Atalǵan ýchaskelerde jyl saıyn kóktemgi tasqyn kezinde joldy sý basý jaǵdaılary tirkelip otyrǵan. Qubyrlar ornatylǵannan keıin tasqyn kezinde sý basý qaýpi bolmaıdy, jasandy qurylystar tolyqqandy jumys isteıdi, – deıdi D.Ámirov.
Degenmen mamannyń málimdeýinshe, qazirgi ýaqytta BQO boıynsha halyqaralyq jáne respýblıkalyq mańyzy bar avtomobıl joldary jelisinde erigen sýlardyń basý qaýpi bar 1 ýchaske anyqtalǵan. Aqtóbe–Oral–RF shekarasy avtomobıl jolynyń 479-shaqyrymy (4,0×2,5 metr tıýbıng ornalasqan) erekshe baqylaýdy qajet etedi.
Osy ýchaskede tótenshe jaǵdaı týyndasa, jedel áreket etý jáne olardyń aldyn alý men joıý sharalaryn ýaqytyly qabyldaý úshin merdiger uıym – «QAJservıs» JShS kúshimen táýlik boıy kezekshilik uıymdastyrylady.
Fılıal málimetine qaraǵanda, bıylǵy tasqyn kezeńinde jumystardy ýaqytyly uıymdastyrý jáne oryndaý maqsatynda joldardy kútip-ustaý aıasynda qajetti materıaldyq resýrstar, sonyń ishinde 400 tonna qum-qıyrshyqtas qospasy jáne 1 myń tonna qıyrshyqtas daıyndaldy.
Sonymen qatar avarııalyq-qalpyna keltirý jáne aldyn alý sharalaryn júrgizý úshin 32 arnaıy tehnıka (5 tıegish, 10 samosval, 6 avtogreıder, 8 traktor jáne 3 jol jóndeý qyzmeti tehnıkasy) ázirlendi. Sondaı-aq 25 myń qap, 150 kúrek (75 dana qalaq kúrek, 75 dana úshkir kúrek), 50 sıgnaldyq baǵana jáne 180 tonna janar-jaǵar maı (90 tonna benzın jáne 90 tonna dızel otyny) satyp alyndy.
– Erigen jáne tasqyn sýlardy jedel aıdaý úshin 5 motopompa bar, qajet bolǵan jaǵdaıda olar respýblıkalyq mańyzy bar avtomobıl joldarynyń eń osal ýchaskelerinde qoldanylady. Tasqyn sýlardyń kedergisiz jáne ýaqytyly ótýin qamtamasyz etý maqsatynda bıylǵy jyldyń 15 naýryzyna deıin barlyq sý ótkizý qubyrlary túgeldeı ashyldy. 16 naýryzdaǵy málimet boıynsha 477 sý ótkizý qubyrynyń 52-si qaýipti bolyp esepteledi. Sondyqtan fılıal tarapynan sý tasqynyna baılanysty turaqty monıtorıng júrgizilip, táýlik boıy patrýldeý uıymdastyrylady. Oǵan qosa sý basýdy joıý, jer tóseminiń shaıylýyn boldyrmaý jáne sý ótkizý qubyrlarynyń tesikterin aldyn ala ashý boıynsha jedel jumystar atqarylady, – dep qosty bólim basshysy.
Ótken jyly kóktemgi tasqyn kezeńinde BQO boıynsha halyqaralyq jáne respýblıkalyq mańyzy bar avtomobıl joldary ýchaskelerinde sý basý jáne shaıylý derekteri tirkelgen joq.
Eske sala keteıik, budan buryn Batys Qazaqstanda sý tasqynynan keler qaýip qandaı ekenin jazǵanbyz.
BQO ózenderinde muzdyń qalyńdyǵy ótken jylǵydan joǵary bolyp otyr.