BQO-da ósimdik sharýashylyǵyn sýbsıdııalaýǵa 726 mln teńge bólindi
BQO aýyl sharýashylyǵy basqarmasy basshysynyń orynbasary Denıs Omashevtiń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde tyńaıtqyshtar qunyn jeńildetýge jergilikti qazynadan 153 mln teńge qaraldy.
Osy qarjyǵa 1600 tonnaǵa jýyq tyńaıtqysh qunyn sýbsıdııalaý kózdelýde. Kúni búgin 1543 tonna tyńaıtqysh satyp alýǵa shart jasalyp, sonyń 937 tonnasy nemese 58 paıyzy jetkizildi.
Basqarma basshysy orynbasarynyń sózine qaraǵanda, 121 mln teńge 38 myń lıtr pestıtsıd baǵasyn arzandatýǵa jumsalmaq. 23,5 mln teńge 7 170 myń tekshe metr sý jetkizý úshin qyzmet qunyn sýbsıdııalaýǵa qaraldy.
Sondaı-aq 1700 tonna tuqymdy sýbsıdııalaýǵa 247 mln teńge berildi.
D.Omashevtiń sózine qaraǵanda, sýbsıdııalaý baǵdarlamalarynan bólek, kóktemgi-dalalyq jumystardy qarjylandyrýǵa «Agrarlyq nesıe korporatsııasy» AQ arqyly nesıelendirýge BQO-ǵa «Keń dala» baǵdarlamasy boıynsha 950 mln teńge (mólsherleme 5 paıyz), «Agrobıznes» arqyly 250 mln teńge (mólsherleme 17 paıyz) bólindi.
Qazirgi ýaqytta barlyǵy 1050,2 mln teńge nesıe berildi, sonyń ishinde «Keń dala» baǵdarlamasy boıynsha 39 aýyl sharýashylyǵy taýaryn óndirýshige – 942,8 mln teńge, «Agrobıznes» arqyly 4 sharýaǵa – 107,4 mln teńge. Ótinimder kóp túsken jaǵdaıda qosymsha qarajat qarastyrylýy múmkin.
«Bıyl oblysta aýyl sharýashylyǵy daqyldarynyń egistik alqaby 520,5 myń gektar bolmaq. Sonyń 213,7 myńy – dándi daqyldar, munyń 57 myńy – kúzdik daqyldar. Jazdyq dándi daqyldar 156,7 myń gektarǵa jetkizilmek. 126 myń gektarǵa maıly daqyl sebiletin bolsa, sonyń 55 myńy kúnbaǵys bolmaq. Sondaı-aq 8762 gektarǵa kartop jáne kókónis-baqsha daqyldaryn, 172 myń gektarǵa mal azyqtyq daqyldardy egý josparlanýda. Kóktemgi egiske qatysatyn tehnıka daıyn, óńir qajetti tuqymmen, janar-jaǵar maımen tolyq qamtylǵan», dedi D.Omashev.
«QazAgroQarjy» AQ BQO boıynsha fılıalynyń dırektory Murat Ihsanovtyń aıtýynsha, Qazaqstanǵa barlyq aýyl sharýashylyǵy tehnıkalarynyń jartysynan kóbi atalmysh kompanııanyń qarjylaı qoldaýymen ákelingen. Tek ótken jyly kompanııa 141 mlrd teńgege 7200 tehnıkany satyp alýdy qarjylandyrǵan. Sonyń ishinde BQO-da 8,2 mlrd teńgege 1060-tan astam tehnıka 428 agroqurylymǵa lızıngke berildi.
«Bıyl bul maqsatqa 5,5 mlrd teńge qaralyp otyr. Úsh aıdyń qorytyndysy boıynsha oblys agroqurylymdarymen 1 mlrd 152 mln teńgeni quraıtyn 204 tehnıkany lızıngke berý jóninde kelisim-shart jasaldy. Sonyń 96-sy (891,4 mln teńge) – kóktemgi-dalalyq jumystarǵa arnalǵan tehnıkalar. Oǵan qosa 1,142 mlrd teńgege 99 tehnıkaǵa ótinimder qabyldanyp, ońdy sheshim shyǵaryldy», dedi M.Ihsanov.
Eske sala keteıik, budan buryn Batys Qazaqstanda 521 myń gektarǵa aýyl sharýashylyǵy daqyldaryn egý kózdelip otyrǵanyn jazǵan bolatynbyz.