BQO-da ónerkásip óniminiń kólemi 1,4 trln teńgege jetti

NUR-SULTAN. QazAqparat – Batys Qazaqstan oblysynda ónerkásip óniminiń kólemi 1,4 trln teńgege jetti. Bul týraly oblys ákimi Ǵalı Esqalıev Ortalyq kommýnıkatsııalar alańynda ótken brıfıngide málim etti, dep habarlaıdy QazAqparat tilshisi.

Memleket basshysy Qasym-Jomart Toqaevtyń «Jańa jaǵdaıdaǵy Qazaqstan: is-qımyl kezeńi» atty Qazaqstan halqyna arnaǵan Joldaýynyń oryndalý barysymen tanystyryp, óńirdiń bıylǵy on aıdaǵy áleýmettik-ekonomıkalyq damý kórsetkishterine toqtalǵan Ǵ.Esqalıevtiń aıtýynsha, ónerkásip óniminiń kólemi ótken jylǵy osy kezeńmen salystyrǵanda 5,2 paıyzǵa ósti.

Onyń sózine qaraǵanda, óńdeý ónerkásibindegi ónimniń azdaǵan tómendeýi indettiń saldarynan Reseıge shyǵarylatyn eksport kóleminiń azaıýyna baılanysty bolyp otyr.

«Jyl sońyna de ıin óńdeý ónerkásibinde jańa jobalardy, sonyń ishinde jıhaz qurastyratyn, transformator óndiretin jáne teri óńdeıtin tsehtardy iske qosamyz», dedi óńir basshysy.

Memleket basshysy Joldaýynda atap ótkenindeı, Qazaqstannyń batys óńirleri gazhımııa salasyn damytýy tıis.

«Sarapshylardyń baǵalaýynsha, ónim qazirgideı kólemde alynatyn bolsa, óńirdegi gaz qory keminde alpys jylǵa jetedi. Munaıǵa suranystyń tómendeýi boljamdalyp otyrǵandyqtan, Batys Qazaqstanǵa gazdy tereń óńdeıtin joba qajet. Biz qazir Energetıka mınıstrligimen gazhımııa salasy boıynsha júzege asyrýǵa bolatyn jobalardy talqylaý ústindemiz», dedi Ǵalı Nájimedenuly.